ബാങ്ക് പലിശയുടെ ഇരട്ടി വരുമാനം ഡിവിഡന്റിലൂടെ കിട്ടും; ഈ കുഞ്ഞന്‍ ഓഹരി കൈവശമുണ്ടോ?

ഒരു കമ്പനിയുടെ ആദായത്തില്‍ നിന്നും ഓഹരി ഉടമകള്‍ക്ക് നല്‍കുന്ന പ്രതിയോഹരി വീതമാണ് ലാഭവിഹിതം അഥവാ ഡിവിഡന്റ്. ഓഹരി വിലയിലുണ്ടാകുന്ന നേട്ടത്തിനു പുറമെ, നിക്ഷേപകര്‍ക്ക് അധിക വരുമാനം നേടുന്നതിനായുള്ള മറ്റൊരു മാര്‍ഗം കൂടിയാണ് കമ്പനികളില്‍ നിന്നും അതാത് സമയങ്ങളില്‍ ലഭിക്കുന്ന ലാഭവിഹിതം. ഇത്തരത്തില്‍ ബാങ്ക് പലിശയില്‍ നിന്നുള്ള വരുമാനത്തിന്റെ ഇരട്ടി ഡിവിഡന്റിലൂടെ നല്‍കുന്ന ഒരു ഓഹരിയാണ് മഹാരത്ന പദവിയുള്ള പൊതുമേഖലാ എണ്ണക്കമ്പനിയായ ഇന്ത്യന്‍ ഓയില്‍ കോര്‍പറേഷന്‍ അഥവാ ഐഒസി.

രാജ്യത്തെ പെട്രോളിയം വിപണിയുടെ 47 ശതമാനം വിഹിതം സ്വന്തമാക്കിയിരിക്കുന്ന ഐഒസി, 2021-22 സാമ്പത്തിക വര്‍ഷത്തില്‍ 3 തവണയാണ് ഓഹരിയുടമകള്‍ക്ക് ലാഭവിഹിതം നല്‍കിയത്. ഇതോടെ നിലവിലെ ഓഹരി വിലയുടെ അടിസ്ഥാനത്തില്‍ ഡിവിഡന്റ് യീല്‍ഡ് 15.7 ശതമാനത്തിലേക്ക് ഉയര്‍ന്നു. കഴിഞ്ഞ ഒരു വര്‍ഷത്തിനിടെ ഓഹരി വിലയില്‍ 2 ശതമാനം ഉയര്‍ച്ചയാണ് രേഖപ്പെടുത്തിയതെങ്കിലും ഓഹരി വിറ്റൊഴിയാതെ തന്നെ 16 ശതമാനത്തോളം ആദായം കരസ്ഥമാക്കാന്‍ നിക്ഷേപകര്‍ക്ക് സാധിച്ചുവെന്നത് ശ്രദ്ധേയമാണ്.

ഐഒസി ഡിവിഡന്റ്

കഴിഞ്ഞ സാമ്പത്തിക വര്‍ഷത്തില്‍ ആദ്യം 2021 നവംബറില്‍ ആദ്യഘട്ടം ലാഭവിഹിതം നല്‍കി. പ്രതിയോഹരി 5 രൂപ വീതമായിരുന്നു നല്‍കിയത്. തുടര്‍ന്ന് 2022 ഫെബ്രുവരിയില്‍ ഓഹരിയൊന്നിന് 4 രൂപ വീതം രണ്ടാം ഇടക്കാല ലാഭവിഹിതവും ഐഒസി കൈമാറി. ഏറ്റവുമൊടുവില്‍ കഴിഞ്ഞ സാമ്പത്തിക വര്‍ഷത്തെ അന്തിമ ലാഭവിഹിതമായി പ്രതിയോഹരി 2.40 രൂപ വീതം കൈമാറുമെന്ന് പ്രഖ്യാപിച്ചു. ഇതിനുള്ള എക്‌സ് ഡിവിഡന്റ് തീയതി 2022 ആഗസ്റ്റ് 11 ആയും നിശ്ചയിച്ചിട്ടുണ്ട്.

വരുമാനക്കണക്ക്

ഓഹരിയുടമകള്‍ക്ക് 2021-22 സാമ്പത്തിക വര്‍ഷത്തില്‍ ആകെ 11.40 രൂപ (5 + 4 + 2.40 ) ലാഭവിഹിതമായി ഐഒസി നല്‍കി. തിങ്കളാഴ്ച രാവിലെ ഐഒസി (BSE: 530965, NSE : IOC) ഓഹരി 72.70 രൂപ നിലവാരത്തിലാണ് വ്യാപാരം ചെയ്യപ്പെടുന്നത്. ഇതുപ്രകാരം ഓഹരിയുടെ നിലവിലെ ഡിവിഡന്റ് യീല്‍ഡ് 15.70 രൂപയാണ്. അതായത് 1,00,000 രൂപയുടെ ഐഒസി ഓഹരികള്‍ കൈവശമുള്ളവര്‍ക്ക് ഡിവിഡന്റ് ഇനത്തിലൂടെ മാത്രം 15,700 രൂപ വരുമാനമായി ലഭിച്ചു. അതും ഓഹരി വിറ്റൊഴിയാതെ എന്നതും ശ്രദ്ധേയം.

എങ്ങനെ വിലയിരുത്തണം

ഏതെങ്കിലും ഒരു വര്‍ഷം ഡിവിഡന്റ് മാത്രം ലാഭവിഹിതം നല്‍കുന്നുതു കൊണ്ടുമാത്രം കാര്യമില്ല. എല്ലാ വര്‍ഷവും സ്ഥിരതയാര്‍ന്ന പ്രകടനം ലാഭവിഹിതം നല്‍കുന്നതില്‍ കാഴ്ചവയ്ക്കുന്ന ഓഹരികള്‍ തെരഞ്ഞെടുക്കാന്‍ ശ്രദ്ധിക്കണം. കമ്പനിയുടെ പ്രകടനം സ്ഥിരതയാര്‍ന്നതല്ലെങ്കില്‍ കൈ പൊള്ളിയേക്കാം. ലാഭവിഹിതം കൂടിയതു കൊണ്ടാണോ ഓഹരി വില ഇടിഞ്ഞതു കൊണ്ടാണോ ഡിവിഡന്റ് യീല്‍ഡ് കുത്തനെ ഉയര്‍ന്നതെന്ന് വിശകലനം ചെയ്ത് ബോധ്യപ്പെട്ടതിനു ശേഷം മാത്രം വാങ്ങുന്നതിന്റെ തീരുമാനമെടുക്കുക.

ഡിവിഡന്റ് കിട്ടുമെന്ന് കരുതി ഓഹരി വാങ്ങുന്നതിന് മുമ്പെ അവയുടെ സാമ്പത്തിക സ്ഥിതിയും പരിശോധിക്കേണ്ടതുണ്ട്. ഡിവിഡന്റ് യീല്‍ഡ് 3% മുകളിലാകണം. ഡിവിഡന്റ് പേ-ഔട്ട് 40 ശതമാനത്തിന് മുകളിലാകണം (മുഖവിലയുടെ ശതമാനം). പറയത്തക്ക കടബാധ്യകള്‍ ഇല്ലാത്തതിനൊപ്പം മുടങ്ങാതെ ലാഭിവിഹിതം നല്‍കുന്ന ചരിത്രവുമുണ്ടോ എന്നു പരിശോധിക്കേണ്ടതും പ്രധാനമാണ്. അതേസമയം ഡിവിഡന്റ് എന്നത് നിക്ഷേപകര്‍ക്ക് ലഭിക്കുന്ന അധിക നേട്ടമാണ്. അതിനാല്‍ ഉയര്‍ന്ന നിലവാരമുള്ളതും കൃത്യമായി ലാഭവിഹിതം നല്‍കുന്നതുമായ കമ്പനികളെ തെരഞ്ഞെടുക്കുന്നത് മികച്ച നിക്ഷേപ തന്ത്രമാണ്.

അറിയിപ്പ്

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിനായി നല്‍കുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലേയും മ്യൂച്ചല്‍ ഫണ്ടിലേയും നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭ നഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.