വോട്ടർ ഐഡി ആധാറുമായി ബന്ധിപ്പിച്ചോ? ഇല്ലെങ്കിൽ വേഗം ചെയ്തോളൂ...ഓൺലൈൻ, ഓഫ്ലൈൻ വഴികൾ അറിയാം

വോട്ടർ ഐഡി ആധാറുമായി ബന്ധിപ്പിക്കൽ അനിവാര്യമാകുന്ന സാഹചര്യം മുന്നിൽക്കണ്ടുകൊണ്ട്, ഇത് എങ്ങനെ ചെയ്യാമെന്ന് അറിയേണ്ടത് നമ്മൾ ഓരോരുത്തർക്കും അത്യാവശ്യമാണ്. ഇതിന് ഓൺലൈൻ, ഓഫ്‌ലൈൻ എന്നിങ്ങനെ വ്യത്യസ്ത രീതികൾ ഉപയോഗിക്കാം. വോട്ടർ ഐഡി ആധാറുമായി ബന്ധിപ്പിക്കുന്നതിന് വോട്ടർ ഐഡി നമ്പർ, ആധാർ നമ്പർ, രജിസ്റ്റർ ചെയ്ത മൊബൈൽ നമ്പർ അല്ലെങ്കിൽ ഇമെയിൽ ഐഡി എന്നിവ നിങ്ങളുടെ പക്കൽ ഉണ്ടായിരിക്കണം.

Take a Poll

1) നാഷണൽ വോട്ടേഴ്‌സ് സർവീസ് പോർട്ടൽ വഴി

*എൻ വി എസ് പി എന്ന ഔദ്യോഗിക വെബ്സൈറ്റ് സന്ദർശിച്ച് രജിസ്റ്റർ ചെയ്യുക.

*ഇതിനകം അക്കൗണ്ട് ഉണ്ടെങ്കിൽ OTP ഉപയോഗിച്ച് ലോഗിൻ ചെയ്യുക.

*ഹോം പേജിൽ 'Aadhaar Collection' → 'Fill Form 6B' എന്ന ഓപ്ഷൻ ക്ലിക്ക് ചെയ്യുക.

*നിങ്ങളുടെ EPIC നമ്പർ (വോട്ടർ ഐഡിയിൽ ചിത്രം മുകളിലുള്ള ബാർകോഡിനടുത്തായി കാണാം) നൽകുക.

*എല്ലാ വിവരങ്ങളും നന്നായി ചേർത്ത് 'Submit' ചെയ്യുക.

2) ഫോൺ വഴി

നിങ്ങളുടെ രജിസ്റ്റർ ചെയ്ത മൊബൈൽ നമ്പറിൽ നിന്ന് 1950 എന്ന നമ്പറിലേക്ക് (പ്രവൃത്തി ദിവസങ്ങളിൽ 10 AM മുതൽ 5 PM വരെ) വിളിക്കുക.

*നിങ്ങളുടെ എപിക് നമ്പറും ആധാർ നമ്പറും ഓപ്പറേറ്ററിന് നൽകുക.

*അവർ നൽകുന്ന നിർദ്ദേശങ്ങൾ അനുസരിച്ച് ബന്ധിപ്പിക്കൽ പൂർത്തിയാക്കാം.

3) എസ് എം എസ് വഴി

നിങ്ങളുടെ രജിസ്റ്റർ ചെയ്ത മൊബൈൽ നമ്പറിൽ നിന്ന് 166 ലേക്ക് അല്ലെങ്കിൽ 51969 എന്ന നമ്പറിലേക്ക് ഒരു മെസേജ് അയയ്ക്കുക.

എസ് എം എസ് ഫോർമാറ്റ്:
ECILINK EPIC NUMBER AADHAAR NUMBER

നിങ്ങൾ നൽകിയ വിവരങ്ങൾ പരിശോധിച്ച ശേഷം ബന്ധിപ്പിക്കൽ പൂർത്തിയാക്കും.

4) വോട്ടർ ഹെൽപ്‌ലൈൻ ആപ്പ് വഴി

ഇലക്ഷൻ കമ്മീഷൻ ഓഫ് ഇന്ത്യ പുറത്തിറക്കിയ വോട്ടർ ഹെൽപ്‌ലൈൻ ആപ്പ് (ആൻഡ്രോയ്ഡ്, ഐ ഒ എസ്) ഡൗൺലോഡ് ചെയ്യുക.

*'Explore' → 'Log in' → 'Voter Registration' → 'Aadhaar Number Submission (Form 6B)' എന്ന ഓപ്ഷൻ തിരഞ്ഞെടുക്കുക.

*'Yes, I have Voter ID number' ക്ലിക്ക് ചെയ്യുക.

*നിങ്ങളുടെ എപിക് നമ്പറും മറ്റ് ആവശ്യമായ വിവരങ്ങളും നൽകുക.

*ആധാർ നമ്പർ, രജിസ്റ്റർ ചെയ്ത മൊബൈൽ നമ്പർ എന്നിവ ചേർത്ത് സബ്‌മിറ്റ് ചെയ്യുക.

5) ഓഫ്‌ലൈൻ ആയി

നിങ്ങളുടെ വീട്ടിന് സമീപമുള്ള ബൂത്ത്‌ ലെവൽ ഓഫീസർ (BLO) ആരെന്ന് ഇ സി ഐ വെബ്സൈറ്റിൽ പരിശോധിക്കുക.

*അവിടെ നിന്നും 'Form 6B' അപേക്ഷാ ഫോറം കൈപ്പറ്റി പൂരിപ്പിക്കുക.

*ബി എൽ ഒ ആധാർ-വോട്ടർ ഐഡി വിവരം പരിശോധിച്ച ശേഷം ബന്ധിപ്പിക്കൽ പൂർത്തിയാക്കും.

എന്ത് ശ്രദ്ധിക്കണം?

*ഒരാൾക്ക് ഒരേയൊരു വോട്ടർ ഐഡിയേ ആധാറുമായി ബന്ധിപ്പിക്കാനാകൂ.

*തിരുത്തലുകൾ ആവശ്യമാണെങ്കിൽ ഇ സി ഐ വെബ്സൈറ്റ് മുഖേന അപേക്ഷിക്കാം.

*ബന്ധിപ്പിച്ചിട്ടും സ്ഥിരീകരണം ലഭിക്കാത്തവർ ബി എൽ ഒയെ നേരിട്ട് സമീപിക്കാം.

ആധാർ-വോട്ടർ ഐഡി ബന്ധിപ്പിക്കൽ വോട്ടർ പട്ടിക ശുദ്ധീകരണത്തിനും കള്ള വോട്ടുകൾ ഒഴിവാക്കുന്നതിനും നിർണായകമാണ്. ഇതിന്റെ പ്രക്രിയ വളരെ ലളിതമായതിനാൽ, മുകളിൽ പറയുന്ന പാതകളിലൂടെ നിങ്ങൾക്ക് ഇതിന് തയ്യാറാകാം - ഓൺലൈൻ, ഫോൺ, എസ് എം എസ്, മൊബൈൽ ആപ്പ്, ഓഫ്‌ലൈൻ. ഇപ്പോൾ തന്നെ ബന്ധിപ്പിച്ചില്ലെങ്കിൽ, ഭാവിയിൽ ഇതു നിർബന്ധമാകാമെന്നതിനാൽ ഇപ്പോഴേ ചെയ്യുന്നതാണ് ഉചിതം.

വോട്ടർ പട്ടികയിൽ പ്രശ്നങ്ങൾ ഉണ്ടെന്നും, കള്ളവോട്ടുകൾ ധാരാളം ഉണ്ടെന്നും കാണിച്ച് ഇന്ത്യ പ്രതിപക്ഷ സഖ്യം ഉയർത്തിയ പരാതികളിന്മേൽ ഗൗരവമായി ചിന്തിച്ച ശേഷമാണ് വർഷങ്ങൾക്ക് മുൻപ് തുടങ്ങിയ, ആധാർ വോട്ടർ ഐ ഡി ബന്ധിപ്പിക്കൽ ഇപ്പോൾ നിർബന്ധമാകുന്ന തരത്തിലേക്ക് തീരുമാനങ്ങൾ നീങ്ങുന്നത്.