പണപ്പെട്ടി നിറയുന്നു; ഈ സ്മോള്‍ കാപ് ഓഹരിയിൽ ഇനി വച്ചടി വച്ചടി കയറ്റം; നേടാം 66% ലാഭം

സമീപകാല താഴ്ചയില്‍ നിന്നും വിപണികള്‍ കരകയറിക്കഴിഞ്ഞു. അടിസ്ഥാനപരമായി മികച്ച ഓഹരികളും തിരികെ കയറ്റത്തിന്റെ പതയിലാണ്. അധികം വൈകാതെ നാലാം പാദഫലങ്ങളും പുറത്തു വന്നു തുടങ്ങും. ഇതിനിടെ ആഗോള ഘടകങ്ങള്‍ കൂടി അനുകൂലമായാല്‍ വിപണിയില്‍ വീണ്ടും ഉത്സാഹത്തിരയിളക്കം വീശിയടിക്കാം. ഇത്തരത്തില്‍ വിലക്കുറവില്‍ നില്‍ക്കുന്നതും സമീപ കാലയളവില്‍ 66% ലാഭം നല്‍കാന്‍ സാധിക്കുന്നതുമായ സ്‌മോള്‍ കാപ് ഓഹരിയില്‍ നിക്ഷേപത്തിന് നിര്‍ദേശിച്ച് ബ്രോക്കറേജ് സ്ഥാപനമായ ഐസിഐസിഐ സെക്യൂരിറ്റീസ് രംഗത്തെത്തി.

മിധാനി

സവിശേഷ ലോഹ സങ്കരങ്ങള്‍ നിര്‍മിക്കുന്ന രാജ്യത്തെ പ്രമുഖ പൊതുമേഖലാ സ്ഥാപനമാണ് മിധാനി അഥവാ മിശ്ര ധാതു നിഗം ലിമിറ്റഡ്. ഹൈദരാബാദ് ആസ്ഥാനമായി പ്രതിരോധ വകുപ്പിന്റെ കീഴില്‍ 1973-ലാണ് തുടക്കം. ആയുധങ്ങള്‍ക്ക് കവചമൊരുക്കുന്ന ലോഹ ഘടകങ്ങളും വെല്‍ഡിങ് ഇലക്ട്രോഡുകളും ബയോമെഡിക്കല്‍ ഇംപ്ലാന്റ്സ്, നിക്കല്‍- ടൈറ്റാനിയം ലോഹ സങ്കരങ്ങളുമാണ് പ്രധാന ഉത്പന്നങ്ങള്‍. അതീവ വ്യാവസായിക പ്രാധാന്യമുള്ള ടൈറ്റാനിയം നിര്‍മിക്കുന്ന ഇന്ത്യയിലെ ഏക കമ്പനിയാണിത്. അടുത്തിടെ റോത്തക്കിലെ നിര്‍മാണ ശാലയും പ്രവര്‍ത്തന സജ്ജമായിട്ടുണ്ട്.

സാമ്പത്തികം

മിധാനിയുടെ സാമ്പത്തിക സ്ഥിതി ശക്തമായ നിലയിലാണ്. കഴിഞ്ഞ 3 സാമ്പത്തിക വര്‍ഷമായി കമ്പനിയുടെ വരുമാനത്തിലും അറ്റാദായത്തിലും പ്രതിയോഹരി വരുമാനത്തിലും വളര്‍ച്ച സ്പഷ്ടമാണ്. ഇക്കഴിഞ്ഞ ഡിസംബര്‍ പാദത്തില്‍ 234 കോടിയാണ് വരുമാനം. ഇത് കഴിഞ്ഞ വര്‍ഷത്തെ സമാന പാദത്തേക്കാള്‍ 23 ശതമാനവും രണ്ടാം പാദത്തേക്കാള്‍ 26 ശതമാനത്തിലധികവും വര്‍ധനയാണ്. അതേസമയം, മൂന്നാം പാദത്തില്‍ മിധാനിയുടെ അറ്റാദായം 43 കോടി രൂപയാണ്. ഇതില്‍ മുന്‍ വര്‍ഷത്തേക്കാള്‍ 29 ശതമാനം ഇടിവാണ് കാണിച്ചത്. ഇതോടെ പ്രതിയോഹരി വരുമാനം 3.21 രൂപയില്‍ നിന്നും 2.29-ലേക്ക് താഴ്ന്നു.

ഓഹരി വിശദാംശം

നിലവില്‍ മിധാനിയുടെ വിപണി മൂല്യം 3,107 കോടി രൂപയാണ്. മുടങ്ങാതെ ലാഭവിഹിതം നല്‍കുന്ന കമ്പനിയുടെ ഡിവിഡന്റ് യീല്‍ഡ് 1.68 ശതമാനമാണ്. പ്രതിയോഹരി ബുക്ക് വാല്യൂ 57.18 രൂപ നിരക്കിലാണുള്ളത്. കഴിഞ്ഞ 12 മാസത്തിനിടെ പ്രതിയോഹരി വരുമാനം 9.09 രൂപയും ഇതേകാലയളവിലെ പിഇ റേഷ്യോ 18.23 നിരക്കിലുമാണ്. അതേസമയം, കമ്പനിയുടെ 74 ശതമാനം ഓഹരികളും സര്‍ക്കാരിന്റെ പക്കലാണ്. ആഭ്യന്തര ധനകാര്യ സ്ഥാപനങ്ങള്‍ക്ക് 14.28 ശതമാനവും റീട്ടെയില്‍ നിക്ഷേപകര്‍ക്ക് 11.47 ശതമാനവും ഓഹരി പങ്കാളിത്തമുണ്ട്. കഴിഞ്ഞ ഒരു മാസത്തിനിടെ ഓഹരി വിലയില്‍ 7 ശതമാനത്തോളം തിരുത്തല്‍ നേരിട്ടു.

ലക്ഷ്യവില 274

വ്യാഴാഴ്ച രാവിലെ 165 രൂപ നിലവാരത്തിലാണ് മിധാനിയുടെ (BSE: 541195, NSE: MIDHANI) ഓഹരി വ്യാപാരം ചെയ്യപ്പെടുന്നത്. ഈ നിലവാരത്തില്‍ നിന്നും 274 രൂപ ലക്ഷ്യമാക്കി നിക്ഷേപം പരിഗണിക്കാമെന്നാണ് ഐസിഐസിഐ സെക്യൂരിറ്റീസ് സൂചിപ്പിച്ചത്. ഇതിലൂടെ അടുത്ത 12 മാസത്തിനകം 66 ശതമാനം ലാഭം നേടാനാകുമെന്നും ബ്രോക്കറേജ് സ്ഥാപനത്തിന്റെ റിപ്പോര്‍ട്ടില്‍ ചൂണ്ടിക്കാട്ടി. അതേസമയം ഒരു വര്‍ഷ കാലയളവിലെ ഓഹരികളുടെ കൂടിയ വില 221.85 രൂപയും താഴ്ന്ന വില 163.15 രൂപയുമായാണ് രേഖപ്പെടുത്തിയിരിക്കുന്നത്.

അറിയിപ്പ്

മുകളില്‍ കൊടുത്തിരിക്കുന്ന ലേഖനം ഐസിഐസിഐ സെക്യൂരിറ്റീസിന്റെ റിപ്പോര്‍ട്ടിനെ അടിസ്ഥാനപ്പെടുത്തിയും പഠനാവശ്യത്തിന് നല്‍കുന്നതുമാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭ നഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.