പുതിയ ഐടിആര്‍ ഫോമുകള്‍ നല്‍കാനൊരുങ്ങി ആദായനികുതി വകുപ്പ്; അറിയണം ഈ പ്രധാന മാറ്റങ്ങള്‍

ആദായനികുതി റിട്ടേണ്‍ ഫോമുകളില്‍ ചില പ്രധാന മാറ്റങ്ങള്‍ വരുത്തിക്കൊണ്ട്, 2019-20 സാമ്പത്തിക വര്‍ഷത്തേക്കുള്ള ഐടിആര്‍ ഫോമുകള്‍ ആദായനികുതി വകുപ്പ് ഇപ്പോള്‍ പുറത്തിറക്കിയിരിക്കുകയാണ് (അസസ്സ്‌മെന്റ് വര്‍ഷം 2020-21). ഒരു ഔദ്യോഗിക വിജ്ഞാപനത്തിലൂടെ ഐടിആര്‍ 1 (സഹാജ്), ഐടിആര്‍ 2, ഐടിആര്‍ 3, ഐടിആര്‍ 4 (സുഗം), ഐടിആര്‍ 5, ഐടിആര്‍ 6, ഐടിആര്‍ 7, ഐടിആര്‍ വി ഫോമുകള്‍ ധനമന്ത്രാലയം പുറത്തിറക്കി. കൊവിഡ് 19 മഹാമാരിയുടെ പശ്ചാത്തലത്തില്‍ ആദായനികുതി നിയമങ്ങളില്‍ വരുത്തിയ മാറ്റങ്ങള്‍ ഉള്‍പ്പെടുത്തുന്നതിനായി ആദായനികുതി വകുപ്പ് നേരത്തെ ഐടിആര്‍ ഫോം, ഐടിആര്‍ ഫോം 2 എന്നിവ പിന്‍വലിച്ചിരുന്നു.

നിങ്ങള്‍ക്കുള്ള ഐടിആര്‍ ഫോം ഏത്?

ഐടിആര്‍ 1 ഫോം: ഇത് സഹാജ് എന്നും അറിയപ്പെടുന്നു. ഇത് പ്രധാനമായും 50 ലക്ഷം രൂപവരെ വാര്‍ഷിക വരുമാനമുള്ള വ്യക്തികള്‍ക്കാണ്.

ഐടിആര്‍ 2 ഫോം: ലാഭം, ബിസിനസ് അല്ലെങ്കില്‍ തൊഴില്‍ നേട്ടങ്ങള്‍ എന്നിവയില്‍ നിന്ന് വരുമാനം ലഭിക്കാത്ത വ്യക്തികള്‍ക്കും ഹിന്ദു അവിഭക്ത കുടുംബങ്ങള്‍ക്കുമുള്ളത്.

ഐടിആര്‍ 3 ഫോം: ലാഭത്തില്‍ നിന്നോ ബിസിനസില്‍ നിന്നോ തൊഴിലില്‍ നിന്നോ വരുമാനമുള്ള വ്യക്തികള്‍ക്കും ഹിന്ദു അവിഭക്ത കുടുംബങ്ങള്‍ക്കും.

 

ഐടിആര്‍ 4 ഫോം: സുഗം എന്നും ഇതറിയപ്പെടുന്നു. 50 ലക്ഷം രൂപവരെ ആകെ വരുമാനമുള്ള വ്യക്തികള്‍, എച്ച്‌യുഎഫ് സ്ഥാപനങ്ങള്‍ (എല്‍എല്‍പി ഒഴികെയുള്ളവ) എന്നിവര്‍ക്കും, ബിസിനസ്, തൊഴില്‍ മേഖലകളില്‍ നിന്നുള്ള വരുമാനം 44AD, 44ADA അല്ലെങ്കില്‍ 44AE വകുപ്പുകള്‍ പ്രകാരം കണക്കാക്കുന്നവര്‍ക്കുമാണ് ഇത് ബാധകം. ഒരു കമ്പനിയില്‍ ഡയറക്ടര്‍ അല്ലെങ്കില്‍ ലിസ്റ്റ് ചെയ്യാത്ത ഷെയറുകളില്‍ നിക്ഷേപം നടത്തിയ വ്യക്തികളെ ഈ ഫോം ഉപയോഗിച്ച് ഐടിആര്‍ ഫയല്‍ ചെയ്യുന്നതില്‍ നിന്ന് വിലക്കിയിരിക്കുന്നു.

ഐടിആര്‍ 5 ഫോം: വ്യക്തി, എച്ച്‌യുഎഫ് കമ്പനി, ഐടിആര്‍ 7 ഫോം ഫയല്‍ ചെയ്യുന്ന വ്യക്തികള്‍ എന്നിവര്‍ ഒഴികെയുള്ളവര്‍ക്ക്.

ഐടിആര്‍ 6 ഫോം: വകുപ്പ് 11 പ്രകാരം ഇളവ് അവകാശപ്പെടുന്ന കമ്പനികള്‍ ഒഴികെയുള്ളവര്‍ക്ക്.

ഐടിആര്‍ 7 ഫോം: 139 (4 എ) അല്ലെങ്കില്‍ 139 (4 ബി) അല്ലെങ്കില്‍ 139 (4 സി) അല്ലെങ്കില്‍ 139 (4 ഡി) വകുപ്പുകള്‍ പ്രകാരം റിട്ടേണ്‍ നല്‍കേണ്ട കമ്പനികള്‍ ഉള്‍പ്പടെയുള്ളവര്‍ക്ക്.

 

2019-20 സാമ്പത്തിക വര്‍ഷം/ 2020-21 അസസ്സ്‌മെന്റ് വര്‍ഷത്തേക്കുള്ള ഐടിആര്‍ ഫോമുകളിലെ മാറ്റങ്ങള്‍

1. ആഭ്യന്തര കമ്പനികളില്‍ നിന്നുള്ള ലാഭവിഹിതമായി നിങ്ങള്‍ക്ക് നികുതി നല്‍കാവുന്ന വരുമാനം ഉണ്ടെങ്കില്‍, ഐടിആര്‍-1 ഫോം ഫയല്‍ ചെയ്യാന്‍ നിങ്ങള്‍ക്ക് യോഗ്യതയുണ്ടാവില്ല.

2. ഒരു വീടിന്റെ സംയുക്ത ഉടമസ്ഥാവകാശം ഉള്ളവര്‍ക്ക് ഐടിആര്‍-1 അല്ലെങ്കില്‍ ഐടിആര്‍-4 ഫയല്‍ ചെയ്യാന്‍ കഴിയില്ല.

3. എല്ലാ ഐടിആര്‍ ഫോമുകളിലെയും കറന്റ് അക്കൗണ്ടുകളിലെ നിക്ഷേപം, വിദേശ യാത്ര, വൈദ്യുതി ബില്ലുകള്‍ എന്നിവയുമായി ബന്ധപ്പെട്ട ചില ചോദ്യങ്ങള്‍ക്ക് ഉത്തരം നല്‍കണം.

 

4. കൊവിഡ് 19 ലോക്ക്ഡൗണ്‍ കണക്കിലെടുത്ത് 2019-20 സാമ്പത്തിക വര്‍ഷത്തില്‍ 2020 ജൂണ്‍ 30 വരെ ചില നികുതി ലാഭിക്കല്‍ നിക്ഷേപം നടത്താന്‍ ആദായനികുതി വകുപ്പ് നികുതിദായകരെ അനുവദിച്ചു.

നികുതിയിളവ് ക്ലെയിം ചെയ്യുന്നതിനായി ഏപ്രില്‍ മുതല്‍ ജൂണ്‍ വരെ നടത്തിയ എല്ലാ നിക്ഷേപങ്ങളുടെയും പേയ്‌മെന്റുകളുടെയും വിശദാംശങ്ങള്‍ പുതിയ ഐടിആര്‍ ഫോമുകള്‍ തേടുന്നുണ്ട്. ലോക്ക്ഡൗണ്‍ കാരണം 2019-20 ലെ എല്ലാ ഐടിആറുകളും ഫയല്‍ ചെയ്യുന്നതിനുള്ള അവസാന തീയതി 2020 നവംബര്‍ 30 വരെ ധനമന്ത്രി നിര്‍മല സീതാരാമന്‍ നീട്ടിയിരുന്നു.