പിഎം കിസാൻ യോജന: അക്കൗണ്ടിൽ 2000 രൂപ എത്തിയില്ലേ? എങ്ങനെ പരാതി നൽകാം

രാജ്യത്തെ കർഷക കുടുംബങ്ങൾക്ക് വരുമാന പിന്തുണ നൽകാൻ ലക്ഷ്യമിട്ടുള്ള കേന്ദ്രസർക്കാർ പദ്ധതിയാണ് പിഎം കിസാൻ യോജന. പ്രതിവർഷം 6000 രൂപയാണ് കർഷകർക്ക് ലഭിക്കുക. മൂന്ന് മാസ ഗഡുക്കളായി 2000 രൂപ വീതം ഗുണഭോക്താക്കളുടെ ബാങ്ക് അക്കൗണ്ടിൽ നേരിട്ടെത്തും. മൂന്നാം തവണ അധികാരത്തിലെത്തിയ മോദി സർക്കാർ കർഷകർക്കുള്ള പിഎം-കിസാൻ നിധിയുടെ 17-ാം ഗഡു അനുവദിച്ചിരുന്നു.

നികുതിയിനത്തിൽ പണം ലാഭിക്കാൻ സ്ത്രീകൾക്ക് അവസരം നൽകുന്ന നിക്ഷേപ പദ്ധതികൾ

കിസാൻ കല്യാണിനോട് പൂർണമായും പ്രതിബദ്ധതയുള്ള സർക്കാരാണിത്. അതിനാൽതന്നെ ചുമതലയേൽക്കുമ്പോൾ ഒപ്പിട്ട ആദ്യത്തെ ഫയൽ കർഷക ക്ഷേമവുമായി ബന്ധപ്പെട്ടതാണെന്ന് പ്രധാനമന്ത്രി പറഞ്ഞു. എന്നാൽ, പലപ്പോഴും ഗഡു ഔദ്യോഗികമായി റിലീസ് ചെയ്‌താലും കർഷകർക്ക് 2000 രൂപ അവരുടെ അക്കൗണ്ടിലേക്ക് ക്രെഡിറ്റ് ചെയ്യപ്പെടാറില്ല. അങ്ങനെയുള്ള സാഹചര്യങ്ങളിൽ അവർക്ക് പരാതി രജിസ്റ്റർ ചെയ്യാം. പരാതി രജിസ്റ്റർ ചെയ്യുന്നതിനു മുൻപ് പിഎം കിസാൻ യോജനയുടെ ഗുണഭോക്തൃ പട്ടികയിൽ ആദ്യം പേര് ഉണ്ടോയെന്ന് പരിശോധിക്കണം.

ഗുണഭോക്തൃ പട്ടികയിൽ പേരുണ്ടോയെന്ന് എങ്ങനെ പരിശോധിക്കാം

ഘട്ടം 1: പിഎം കിസാൻ യോജനയുടെ ഔദ്യോഗിക വെബ്സൈറ്റായ pmkisan.gov.in സന്ദർശിക്കുക

ഘട്ടം 2: ഹോം പേജിൽ കാണുന്ന 'Beneficiary Status' ടാബിൽ ക്ലിക്ക് ചെയ്യുക

ഘട്ടം 3: ഒരു ഓപ്ഷൻ തിരഞ്ഞെടുക്കുക - ഒന്നുകിൽ ആധാർ നമ്പർ, അക്കൗണ്ട് നമ്പർ അല്ലെങ്കിൽ മൊബൈൽ നമ്പർ

ഘട്ടം 4: 'Get Data' എന്ന ഓപ്ഷനിൽ ക്ലിക്ക് ചെയ്യുക

ഘട്ടം 5: ഗുണഭോക്താക്കൾക്ക് ഡാറ്റ കാണാൻ കഴിയും.

കർഷകന്റെ പേര് ലിസ്റ്റിൽ ഉൾപ്പെട്ടിട്ടുണ്ടെങ്കിൽ പണം ലഭിക്കാത്ത സാഹചര്യത്തിൽ അവർക്ക് പരാതി നൽകാം. ഫോൺ കോളിലൂടെയും ഇ-മെയിൽ വഴിയും തപാൽ വഴിയും പരാതി രജിസ്റ്റർ ചെയ്യാം.

ഇ-മെയിൽ ഐഡി: pmkisan-ictgov.in, pmkisan-fundsgov.in

ഹെൽപ്‌ലൈൻ നമ്പർ: 011-24300606,155261

ടോൾ ഫ്രീ നമ്പർ: 1800-115-526

ലോകത്തിലെ ഏറ്റവും വലിയ ഡയറക്ട് ബെനിഫിറ്റ് ട്രാൻസ്ഫർ (DBT) പദ്ധതികളിൽ ഒന്നാണ് പ്രധാനമന്ത്രി കിസാൻ യോജന. 2018 ഡിസംബർ 1 മുതലാണ് പദ്ധതി തുടങ്ങിയത്. എട്ട് കോടിയിലധികം കർഷകർക്ക് 20,000 കോടി രൂപയാണ് പദ്ധതിക്കായി വകയിരുത്തിയിട്ടുള്ളത്. രാജ്യത്തെ 9.3 കോടി കർഷകർക്ക് പദ്ധതിയിലൂടെ പ്രയോജനം ലഭിക്കും.