രാജ്യത്ത് സുഗന്ധവ്യഞ്ജന കയറ്റുമതിയില്‍ 15 ശതമാനം വര്‍ദ്ധന; താരമായി വറ്റല്‍ മുളകും ജീരകവും

കൊച്ചി: രാജ്യത്തെ സുഗന്ധവ്യഞ്ജന കയറ്റുമതി വര്‍ദ്ധിച്ചതായി റിപ്പോര്‍ട്ട്. ഈ നടപ്പു സാമ്പത്തിക വര്‍ഷത്തില്‍ ഏപ്രില്‍-ആഗസ്റ്റ് കാലയളവില്‍ സുഗന്ധവ്യഞ്ജനങ്ങള്‍ 15 ശതമാനം വരെ ഉയര്‍ന്നെന്നാണ് റിപ്പോര്‍ട്ട്. മഞ്ഞള്‍, ജീരകം, വറ്റല്‍ മുളക് എന്നിവയുടെ കയറ്റുമതിയിലുണ്ടായ വര്‍ദ്ധനയാണ് ഈ ആകെ കയറ്റുമതിയില്‍ പ്രതിഫലിച്ചതെന്ന് സ്‌പൈസസ് ബോര്‍ഡ് പുറത്തുവിട്ട കണക്കില്‍ നിന്ന് വ്യക്തമാകുന്നു.

5.78 ലക്ഷം ടണ്‍ സുഗന്ധവ്യഞ്ജനങ്ങളാണ് ഇന്ത്യ ഈ പറഞ്ഞ മാസങ്ങളില്‍ കയറ്റി അയച്ചത്. ഇത് 10,001.61 കോടി രൂപയുടെ മൂല്യം വരും. കഴിഞ്ഞ വര്‍ഷം ഇതേ കാലയളവില്‍ 8,858.06 കോടി രൂപയുടെ 4.94 ലക്ഷം ടണ്‍ സുഗന്ധവ്യഞ്ജനങ്ങളാണ് കയറ്റി അയച്ചത്. കൊവിഡ് പൊട്ടിപ്പുറപ്പെട്ടതോടെ പ്രതിരോധ ശേഷി വര്‍ദ്ധിപ്പിക്കാന്‍ മഞ്ഞള്‍ അടക്കമുള്ള സുഗന്ധവ്യഞ്ജനങ്ങള്‍ സഹായിക്കുമെന്ന കാര്യം കയറ്റുമതിയില്‍ വര്‍ദ്ധനവ് ഉണ്ടാക്കാന്‍ കാരണമായി.

കൂടാതെ വറ്റല്‍ മുളകിന്റെ കയറ്റുമതിയില്‍ വന്‍ വര്‍ദ്ധനയാണ് സംഭവിച്ചിരിക്കുന്നത്. 2.10 ലക്ഷം ടണ്‍ വറ്റല്‍ മുളകാണ് ഏപ്രില്‍-ആഗസ്റ്റ് കാലയളവില്‍ മാത്രം കയറ്റി അയച്ചിരിക്കുന്നത്. ഇതിലൂടെ മാത്രം 2,876 കോടി രൂപയുടെ വരുമാനം നേടി. രണ്ടാം സ്ഥാനം സ്വന്തമാക്കിയത് ജീരകമാണ്. 1.33 ലക്ഷം ജീരകമാണ് ഈ കാലയളവില്‍ കയറ്റുമതി ചെയ്തത്. 1873.70 കോടി രൂപയോളം വരും ഇത്.