അടുത്താഴ്ച ഇരട്ടിക്കുന്ന രണ്ട് ഓഹരികൾ; കയ്യിലുണ്ടോ? വാങ്ങാനാണെങ്കിൽ ഇനിയും അവസരം

ഓഹരി വിപണിയിലെ ചലനങ്ങളിൽ പ്രധാനപ്പെട്ടതാണ് കോർപ്പറേറ്റ് നടപടികൾ. ഓരോ ആഴ്ചയിലും ഡിവിഡന്റ്, ഓഹരി വിഭജനം, ബോണസ് ഓഹരി, അവകാശ ഓഹരി എന്നിങ്ങനെ കമ്പനികൾ പലവിധ കോർപ്പറേറ്റ് നടപടികളിലേക്ക് കടക്കാറുണ്ട്. അടുത്താഴ്ച ബോണസ് ഓഹരിയിലേക്ക് കടക്കുന്ന രണ്ട് ഓഹരികളാണ് എച്ച്ഡിഎഫ്‌സി അസ്റ്റ് മാനേജ്‌മെന്റ് കമ്പനിയും ടൈറോകെയർ ടെക്‌നോളജീസും. അധിക സാമ്പത്തികം ആവശ്യമില്ലാതെ ഓഹരികളുടെ എണ്ണം വർധിപ്പിക്കാം എന്നതാണ് ബോണസ് ഓഹരിയുടെ നേട്ടം.

കമ്പനികൾ ലാഭവിഹിതം പണമായി കൈമാറുന്നത് പോലെ ഓഹരികൾ കൈമാറുന്ന കോർപ്പറേറ്റ് നടപടിയാണ് ബോണസ് ഓഹരി. നിശ്ചിത അനുപാതത്തിലാണ് ബോണസ് ഓഹരി കൈമാറുന്നത്. വിശദാംശങ്ങൾ നോക്കാം.

എച്ച്ഡിഎഫ്‌സി എഎംസി

ഇന്ത്യയിലെ ഏറ്റവും വലിയ അസ്റ്റ് മാനേജ്‌മെന്റ് കമ്പനികളിൽ ഒന്നാണ് എച്ച്ഡിഎഫ്‌സി എഎംസി. എച്ച്ഡിഎഫ്‌സി ബാങ്കിന് കമ്പനിയിൽ 52.4 ശതമാനം ഓഹരി പങ്കാളിത്തമുണ്ട്്. ഒക്ടോബർ 15 ന് ചേർന്ന കമ്പനിയുടെ ബോർഡ് യോഗമാണ് ബോണസ് ഓഹരിക്ക് അംഗീകാരം നൽകിയത്.

1:1 അനുപാതത്തിലാണ് എച്ച്ഡിഎഫ്‌സി എഎംസി ബോണസ് ഓഹരികൾ നൽകുന്നത്. അതായത് അഞ്ച് രൂപ മുഖവിലയുള്ള എച്ച്ഡിഎഫ്‌സി എഎംസിയുടെ ഒരു ഓഹരിക്ക് മറ്റൊരം ഓഹരി സൗജന്യമായി ലഭിക്കും. ഇതിനുള്ള റെക്കോർഡ് തിയതി നവംബർ 26 ആണ്. ഈ ദിവസം കമ്പനിയുട ഓഹരി ഉടമകളായിരിക്കുന്നവർക്ക് ബോണസ് ഓഹരി ലഭിക്കും.

കഴിഞ്ഞ മൂന്നു മാസങ്ങളിലായി ഏഴു ശതമാനം ഇടിവിലാണ് എച്ച്ഡിഎഫ്‌സി എഎംസി ഓഹരികൾ. ഒരു വർഷത്തിനിടെ 28 ശതമാനം നേട്ടം ഓഹരിയുണ്ടാക്കി.

കമ്പനിയുടെ ലാഭം 24.6 ശതമാനം വർധിച്ച് 718.43 കോടി രൂപയായി. വരുമാനം 15.8 ശതമാനം ഉയർന്ന് 1027.40 കോടിയിലെത്തി. എന്നാൽ ജൂൺ പാദത്തെ അപേക്ഷിച്ച് 3.9 ശതമാനത്തിന്റെ ഇടിവ് ലാഭത്തിലുണ്ടായി. വരുമാനം ആറു ശതമാനം ഉയർന്നു. കമ്പനി കൈകാര്യം ചെയ്യുന്ന ആസ്തി 14 ശതമാനം ഉയർന്ന് 8.72 ലക്ഷം കോടി രൂപയായി. ജൂൺപാദത്തേക്കാൾ രണ്ടു ശതമാനം വർധനവുണ്ടായി.

തൈറോകെയർ ടെക്‌നോളജീസ്

മുൻനിര ഡയഗ്നോസ്റ്റിക് കമ്പനിയാണ് തൈറോകെയർ ടെക്‌നോളജീസ്. മുംബൈയിലാണ് കമ്പനിയുടെ പ്രധാന ലാബ് സ്ഥിതി ചെയ്യുന്നത്.

2:1 അനുപാതത്തിലാണ് തൈറോകെയർ ടെക്‌നോളജീസ് ബോണസ് ഓഹരി നൽകുന്നത്. 10 രൂപ മുഖവിലയുള്ള ഓഹരിയൊന്നിന് രണ്ട് ഓഹരികൾ വീതം ലഭിക്കും. അതായത് 100 ഓഹരികളുള്ള വ്യക്തിക്ക് 300 ഓഹരികളായി മാറും. നവംബർ 28 ആണ് ഇതിനുള്ള റെക്കോർഡ് തീയതി. ഡിസംബർ ഒന്നിന് ഓഹരികൾ അനുവദിക്കും. ഒരു വർഷത്തിനിടെ 58 ശതമാനം നേട്ടമുണ്ടാക്കിയ ഓഹരിയാണിത്.

സെപ്റ്റംബർ പാദത്തിൽ മികച്ച മുന്നേറ്റമാണ് കമ്പനിയുടെ ലാഭത്തിലുണ്ടായത്. അറ്റാദായം 79 ശതമാനം ഉയർന്ന് 48 കോടി രൂപയായി. ഉയർന്ന ടെസ്റ്റ് വോളിയവും കാര്യക്ഷമത ഉയർന്നതുമാണ് നേട്ടത്തിന് പിന്നിൽ. വരുമാനം 22 ശതമാനം ഉയർന്ന് 216.5 കോടി രൂപയായി.

ശ്രദ്ധിക്കേണ്ട കാര്യങ്ങൾ

എക്‌സ് ബോണസ് തീയതിക്ക് മുൻപ് ഓഹരി വാങ്ങുന്നവർക്കാണ് ബോണസ് ഓഹരിക്ക് അർഹതയുണ്ടാവുക.

കോർപ്പറേറ്റ് നടപടികൾക്ക് അർഹരായ നിക്ഷേപകരെ കണ്ടെത്താനുള്ളതാണ് റെക്കോർഡ് തീയതി. റെക്കോർഡ് തീയതിയിൽ ഓഹരി ഉടമകളായവർക്ക് ബോണസ് ഓഹരിക്ക് അർഹതയുണ്ടാകും.

ബോണസ് ഓഹരിക്ക് ശേഷം ഓഹരി വില നിശ്ചിത അനുപാതത്തിൽ കുറയുകയും ഓഹരികളുടെ എണ്ണം വർധിക്കുകയും ചെയ്യും. അതിനാൽ നിക്ഷേപ മൂല്യത്തിൽ കുറവുണ്ടാകുന്നില്ല.