<p><strong>

</strong>മുംബൈ: മൂന്നു ദിവസത്തെ തുടര്‍ച്ചയായ നഷ്ടത്തിനൊടുവില്‍ ഇന്ത്യന്‍ ഓഹരി വിപണി നേരിയ ലാഭത്തില്‍ ക്ലോസ് ചെയ്തു. ഇന്ത്യന്‍ മണ്‍സൂണ്‍ രണ്ടു ദിവസത്തിനുള്ളില്‍ കേരളതീരത്തെത്തുമെന്ന വാര്‍ത്തകള്‍ വിപണിക്ക് അനുഗ്രഹമായി.</p> <p>ആഗോളവിപണിയില്‍ എണ്ണവിലയിലുണ്ടായ കുറവും പണപ്പെരുപ്പ നിരക്ക് ചെറിയ തോതില്‍ താഴേക്കിറങ്ങിയതും റിസര്‍വ് ബാങ്ക് അടിസ്ഥാന നിരക്കുകളില്‍ മാറ്റം വരുത്തുമെന്ന പ്രതീക്ഷകള്‍ വീണ്ടും സജീവമാക്കി. സെന്‍സെക്‌സ് 23.24 പോയിന്റ് വര്‍ധിച്ച് 15988.40ലും നിഫ്റ്റി 6.55 പോയിന്റ് കൂടി 4848.15ലും വില്‍പ്പന അവസാനിപ്പിച്ചു.<br /><br />പാന്റലൂണ്‍ റീട്ടെയില്‍, ഹെക്‌സാവെയര്‍ ടെക്‌നോളജീസ്, മണപ്പുറം ഫിനാന്‍സ്, ഇന്ത്യ ബുള്‍സ് റിയല്‍ എസ്റ്റേറ്റ്, ജയപ്രകാശ് അസോസിയേറ്റ് ഓഹരികള്‍ അഞ്ചു ശതമാനത്തോളം മുന്നേറി. <br /><br />ബ്ലുചിപ്പ് ഓഹരികളില്‍ ലാര്‍സണ്‍ ടര്‍ബോ മികച്ച മുന്നേറ്റമാണ് നടത്തിയത്. 3.43 ശതമാനം നേട്ടത്തോടെ 1173.40ലാണ് ക്ലോസ് ചെയ്തത്. റിലയന്‍സ് ഇന്‍ഡസ്ട്രീസ് 8.95 പോയിന്റ് നേട്ടത്തോടെ 692.65ലെത്തി. രാജ്യത്തെ ഏറ്റവും വലിയ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ 0.99 ശതമാനം നേട്ടമുണ്ടാക്കി.<br /><br />ആഗോളവിപണിയില്‍ എണ്ണ വിലയിലുണ്ടാകുന്ന കുറവ് ഇന്ത്യന്‍ വിതരണ കമ്പനികളെ പ്രതികൂലമായി ബാധിച്ചു. ഗുജറാത്ത് ഗ്യാസ് ലിമിറ്റഡ്, പെട്രോനെറ്റ് എല്‍എന്‍ജി, നെയ്‌വേലി ലിഗ്നൈറ്റ്, ഇന്ദ്രപ്രസ്ഥാ ഗ്യാസ് ലിമിറ്റഡ് ഓഹരികള്‍ക്ക് കാര്യമായ തിരിച്ചടിയേറ്റു. ജൂബിലന്റ് ഫുഡ്‌വര്‍ക്‌സ് ലിമിറ്റഡിനും നല്ല ദിവസമായിരുന്നില്ല.</p>