<p><strong>

</strong>മുംബൈ: ഏതൊരു ചെറിയ മുന്നേറ്റത്തില്‍ നിന്നും ലാഭമമെടുക്കാനുള്ള നിക്ഷേപകരുടെ ശ്രമം പലപ്പോഴും വിപണിയെ സമ്മര്‍ദ്ദത്തിലാക്കുന്നു. വില്‍പ്പന സമ്മര്‍ദ്ദത്തെ തുടര്‍ന്ന് മുംബൈ ഓഹരി സൂചികയായ സെന്‍സെക്‌സ് 129.21 പോയിന്റ് നഷ്ടത്തില്‍ 17489.14ലും ദേശീയ സൂചികയായ നിഫ്റ്റി 39.05 കുറഞ്ഞ് 5306.30ലും ക്ലോസ് ചെയ്തു.</p> <p>ആഗോളവിപണിയില്‍ നിന്നുള്ള പ്രതികൂല വാര്‍ത്തകള്‍ തന്നെയാണ് ലാഭമെടുക്കാന്‍ നിക്ഷേപകരെ പ്രേരിപ്പിക്കുന്നത്. കൂടാതെ ധനകാര്യവകുപ്പിന്റെ കാര്യത്തില്‍ ഇപ്പോഴും വ്യക്തമായ ഒരുത്തരമില്ലാത്ത പശ്ചാത്തലവും നിക്ഷേപകരെ അലട്ടുന്നുണ്ട്. പ്രധാനമന്ത്രിയുടെ ചുമതലക്കൊപ്പം മന്‍മോഹന്‍സിങ് ധനകാര്യവകുപ്പ് കൈകാര്യം ചെയ്യുന്നത് പ്രത്യേകിച്ച് യാതൊരു ഗുണവുമില്ലെന്ന നിലപാടാണ് സാമ്പത്തിക വിദഗ്ധര്‍ക്കുള്ളത്.</p> <p>ധനകാര്യവകുപ്പിലെ ഫയലുകള്‍ ഒപ്പിടാന്‍ മാത്രം അരദിവസത്തോളം സമയം വേണ്ടി വരും. പിന്നെയെങ്ങനെയാണ് പ്രധാനമന്ത്രിയുടെ ചുമതലക്കൊപ്പം ഈ മന്ത്രാലയം കൂടി നോക്കിനടത്തുകയെന്ന ചോദ്യവും പ്രസക്തമാണ്. അങ്ങനെ വരുമ്പോള്‍ ആഗോളവിപണിയില്‍ നിന്നുള്ള ഏത് തിരിച്ചടിയും ഇന്ത്യന്‍ മാര്‍ക്കറ്റില്‍ പ്രതിഫലിക്കും.</p> <p>ജെയ്പൂര്‍ ഇന്‍ഫ്രാടെക് ലിമിറ്റഡ്, എംഎം ഫിന്‍സര്‍വീസ്, മദര്‍സണ്‍സുമി സിസ്റ്റംസ്, ഫിനാന്‍ഷ്യല്‍ ടെക്‌നോളജി, തെര്‍മാക്‌സ് ലിമിറ്റഡ് കമ്പനികള്‍ നേട്ടത്തിലാണ് വില്‍പ്പന അവസാനിപ്പിച്ചത്. സിന്‍ഡിക്കേറ്റ് ബാങ്ക്, എന്‍എംഡിസി ലിമിറ്റഡ്, നാഷണല്‍ അലുംനി, കുമിന്‍സ് ഇന്ത്യ ലിമിറ്റഡ്, ഹിന്‍ഡാല്‍കോ ഇന്‍ഡസ്ട്രീസ് എന്നീ കമ്പനികള്‍ക്കാണ് വലിയ തിരിച്ചടിയേറ്റത്.</p>