<p>വാഷിംഗ്ടണ്‍: തകരുന്ന സമ്പദ് വ്യവസ്ഥയുള്ള 5 രാജ്യങ്ങളുടെ കൂട്ടത്തില്‍ ഇന്ത്യയും. ലോകത്തിലെ ഏറ്റവും വലിയ ജനാധിപത്യരാജ്യമായ ഇന്ത്യ ഇതില്‍ ഏറ്റവും ദുര്‍ബലമായ 3 രാജ്യങ്ങളില്‍ ഒന്നും. അമേരിക്കയിലെ ജോര്‍ജ് വാഷിംഗ്ടണ്‍ യൂണിവേഴ്‌സിറ്റിയിലെ ഇന്റര്‍നാഷനല്‍ സ്‌കൂള്‍ ഫോര്‍ എലിയറ്റ് സ്‌കൂളില്‍ പ്രഭാഷണം നടത്തവേയാണ് ഇന്റര്‍നാഷനല്‍ ഫിനാന്‍സ് അസിസ്റ്റന്റ് ട്രഷറി സെക്രട്ടറി കൂടിയായ ചാള്‍സ് കോളിന്‍സ് ഇക്കാര്യം പറഞ്ഞത്.</p> <p>വരാനിരിക്കുന്നലോക്‌സഭാ തെരഞ്ഞടുപ്പില്‍ ഇന്ത്യയില്‍ അധികാരം കൈയ്യാളുന്ന കോണ്‍ഗ്രസ്സ് പാര്‍ട്ടിയ്ക്ക് ബദലായി പുത്തന്‍ ഭരണ പരിഷ്‌ക്കരണങ്ങള്‍ മുന്നോട്ടു വയ്ക്കുന്ന ബി.ജെ.പി ഒറ്റയ്ക്ക് അധികാരത്തിലെത്തുമെന്ന് ഉറപ്പില്ല. എന്നാല്‍ ഈ പാര്‍ട്ടിയുടെ കൂടെ നില്‍ക്കാന്‍ സാദ്ധ്യതയുള്ള ചെറു പാര്‍ട്ടികളാവട്ടെ ഐക്യരൂപ്യമില്ലാത്ത വികസന ആശയങ്ങളുടെ വക്താക്കളും. ഇവ ചേര്‍ന്നസഖ്യങ്ങളുടെഭരണം സമ്പദ് വ്യവസ്ഥയെ പിന്നോട്ടടിക്കുമെന്ന് കോളിന്‍സ് അഭിപ്രായപ്പെടുന്നു.<br /><strong>

</strong></p> <p>ഭൂരിപക്ഷമില്ലാത്ത ഭരണം സമ്പദ് വ്യവസ്ഥയെ പിന്‍തിരിപ്പന്‍ ആശയങ്ങളിലേയ്ക്ക് കൊണ്ടുപോകുമെന്നും അദ്ദേഹം പറഞ്ഞു. ഇന്ത്യയെക്കൂടാതെ ബ്രസീല്‍, ഇന്തോനേഷ്യ, ടര്‍ക്കി, സൗത്ത് ആഫ്രിക്ക എന്നീ രാജ്യങ്ങളാണ് പ്രതിസന്ധി അഭിമുഖീകരിക്കുന്ന മറ്റ് സമ്പദ് വ്യവസ്ഥകള്‍. ഇതില്‍ ഇന്ത്യയെക്കൂടാതെ ഏറ്റവും മോശമായ അവസ്ഥയുള്ളത് ബ്രസീലിലും ഇന്തോനേഷ്യയിലും ആണ്.</p> <p>വികസിതങ്ങളായ മറ്റ് സമ്പദ് വ്യവസ്ഥകളും ഈ രാജ്യങ്ങളും തമ്മിലുള്ള വിനിമയ നിരക്ക് കുത്തനെ ഇടിയുമെന്നും ഈ സ്ഥിതി വിശേഷം മാസങ്ങള്‍ക്കകം വളരെ വ്യക്തമാകുമെന്നും സമ്പദ് വ്യവസ്ഥയില്‍ ഇതിന്റെ പ്രതിഫലനങ്ങള്‍ ഉണ്ടാവുമെന്നും കോളിന്‍സ് പറഞ്ഞു. ഉടന്‍തന്നെ ഈ രാജ്യങ്ങള്‍ പലിശ നിരക്ക് വര്‍ദ്ധിപ്പിച്ചും ആഭ്യന്തര ഉല്പാദനം വര്‍ധിപ്പിച്ച് കയറ്റുമതി പ്രോത്സാഹിപ്പിച്ചും മറ്റും പുതിയ നയങ്ങള്‍ ആവിഷ്‌ക്കരിച്ചില്ലെങ്കില്‍ വരും നാളുകള്‍ കടുത്തതാകുമെന്ന് അദ്ദേഹം സൂചിപ്പിച്ചു.</p>