കേന്ദ്രസര്‍ക്കാറിന്റെ പുതിയ പദ്ധതിയായ ഗോള്‍ഡ് ബോണ്ടിന് മികച്ച പ്രതികരണം. ആദ്യഘട്ടത്തില്‍ത്തന്നെ 63,000 അപേക്ഷകളിലായി 246 കോടി രൂപയാണ് ബോണ്ട് വില്പയിലൂടെ സമാഹരിച്ചത്.

അതിനാല്‍ ഇതിലൂടെ 970 കിലോഗ്രാം സ്വര്‍ണത്തിന് തുല്യമായ ബോണ്ടുകളാണ് വിതരണംചെയ്യുക. സ്വര്‍ണ വിപണി വിലയില്‍ വ്യതിയാനം വന്നിട്ടും കൂടിയ വിലയ്ക്ക് ബോണ്ട് വാങ്ങാന്‍ നിക്ഷേപകര്‍ താല്‍പര്യം കാണിച്ചു. ആയതിനാല്‍ പദ്ധതി വിജയകരമാകുമെന്നതിന്റെ സൂചനയാണ് നല്‍കുന്നത്.

ഒരു ഗ്രാം സ്വര്‍ണത്തിന്റെ വിലയായ 2,684 രൂപയ്ക്ക് തുല്യമായ മൂല്യത്തിനാണ് ബോണ്ട് പുറത്തിറക്കുക. രണ്ട് ഗ്രാമാണ് ചുരുങ്ങിയ നിക്ഷേപം. പരമാവധി 500 ഗ്രാംവരെ നിക്ഷേപിക്കാം. അപേക്ഷകളുടെ എണ്ണം പ്രതീക്ഷിച്ചതിലേറെയായതിനാല്‍ ബോണ്ട് പുറത്തിറക്കുന്നത് റിസര്‍വ് ബാങ്ക് നവംബര്‍ 30ലേയ്ക്ക് നീട്ടിയിരുന്നു.