ഡിജിറ്റല്‍ രംഗത്ത് പുതിയ കുതിപ്പുകള്‍ തേടുന്ന ഇന്ത്യയുടെ ഇ കൊമേഴ്‌സ് വിപണി ഈവര്‍ഷം 3,800 കോടി ഡോളറിലേക്ക് കുതിക്കുമെന്ന് അസോചത്തിന്റെ പഠന റിപ്പോര്‍ട്ട്. 2016 ല്‍ വരുമാനം 67 ശതമാനം വര്‍ദ്ധിക്കുമെന്ന് അസോചം ചൂണ്ടിക്കാട്ടുന്നു. കഴിഞ്ഞവര്‍ഷം 2,300 കോടി ഡോളറിന്റെ വരുമാനമാണ് ഇന്ത്യയില്‍ ഇ കൊമേഴ്‌സ് കമ്പനികള്‍ക്ക് ഉണ്ടായ നേട്ടം

2014നേക്കാള്‍ 52 ശതമാനം വരുമാന വര്‍ദ്ധനയാണ് കഴിഞ്ഞ വര്‍ഷമുണ്ടായത്.മൊബൈല്‍ ഫോണ്‍ വില്പന അനുദിനം മുന്നേറുന്നതും ഇന്റര്‍നെറ്റ് ഉപഭോക്താക്കളുടെ എണ്ണം വര്‍ദ്ധിക്കുന്നതും ഇ വിപണിക്ക് ഏറെ ഗുണം ചെയ്യുന്നുണ്ട്. ഈ രംഗത്തെ കമ്പനികള്‍ ആകര്‍ഷകമായ വിലയക്ക് ഉത്പന്നങ്ങള്‍ വാഗ്ദാനം ചെയ്യുന്നതും പേമെന്റ് സാഹചര്യം മെച്ചപ്പെട്ടതും വരുമാനക്കുതിപ്പിന് കാരണമായിട്ടുണ്ട്.

കഴിഞ്ഞവര്‍ഷം 45 ശതമാനം ഇടപാടുകളും ക്യാഷ് ഓണ്‍ ഡെലിവറിയിലൂടെയായിരുന്നു. ക്രെഡിറ്റ് കാര്‍ഡുവഴി 16 ശതമാനവും ഡെബിറ്റ് കാര്‍ഡുവഴി 21 ശതമാനവും വില്പന നടന്നു. 18നും 25നും ഇടെയില്‍ പ്രായമുള്ളവരാണ് ഓണ്‍ലൈന്‍ ഷോപ്പിംഗിന് ഏറെ താത്പര്യം കാട്ടുന്നതെന്നും പഠനം ചൂണ്ടിക്കാട്ടുന്നു.