ന്യൂഡല്‍ഹി:ഇപിഎഫ്ഒ പുതിയ പദ്ധതിക്കു തുടക്കംകുറിക്കുന്നു.വണ്‍ എംപ്ലോയീ വണ്‍ ഇപിഎഫ് അക്കൗണ്ട് എന്ന പേരില്‍ നടപ്പാക്കാനുദ്ദേശിക്കുന്ന പദ്ധതി മേയ് ഒന്നിനു പ്രഖ്യാപിച്ചേക്കും. ഇപിഎഫ്ഒയുടെ കഴിഞ്ഞ 21നു ചേര്‍ന്ന യോഗത്തിലാണു തീരുമാനം.എംപ്ലോയിസ് പ്രൊവിഡന്റ് ഫണ്ട് നിക്ഷേപങ്ങള്‍ കാലാവധി പൂര്‍ത്തിയാകുന്നതിനു മുന്‍പു പിന്‍വലിക്കുന്ന പ്രവണത പ്രോത്സാഹിപ്പിക്കാതിരിക്കാനാണ് ഈ പദ്ധതി കൊണ്ടുവരുന്നത്.

വലിയ പ്രക്ഷോഭം ഉയര്‍ന്ന സാഹചര്യത്തില്‍ പിഎഫ് തുക പിന്‍വലിക്കുന്നതിനു കൊണ്ടുവന്ന നിയന്ത്രണങ്ങള്‍ കഴിഞ്ഞ 20നു കേന്ദ്ര സര്‍ക്കാര്‍ പിന്‍വലിച്ചിരുന്നു. തൊഴിലുടമ അടയ്ക്കുന്ന വിഹിതം ഉള്‍പ്പെടെ പിഎഫിലുള്ള മുഴുവന്‍ തുകയും 58 വയസ് കഴിഞ്ഞാലേ പിന്‍വലിക്കാന്‍ കഴിയൂ എന്ന് കഴിഞ്ഞ ഫെബ്രുവരി 10നു കേന്ദ്ര സര്‍ക്കാര്‍ കൊണ്ടുവന്ന നിയമമാണ് പിന്‍വലിച്ചത്.