ന്യൂഡല്‍ഹി: റിസര്‍വ് ബാങ്ക് വായ്പാ നയം പ്രഖ്യാപിച്ചു. നിരക്കുകളില്‍ മാറ്റമില്ല.നടപ്പു സാമ്പത്തിക വര്‍ഷത്തിലെ രണ്ടാമത്തെ വായ്പാ നയമാണ് ചൊവ്വാഴ്ച റിസര്‍വ് ബാങ്ക് ഗവര്‍ണര്‍ രഘുറാം രാജന്‍ പ്രഖ്യാപിച്ചത്.

സെപ്റ്റംബര്‍ കഴിഞ്ഞ് ഔദ്യോഗിക കാലാവധി ദീര്‍ഘിപ്പിക്കുന്നില്ലെങ്കില്‍ ആര്‍ബിഐ ഗവര്‍ണര്‍ രഘുറാം രാജന്റെ അവസാനത്തെ നയ പ്രഖ്യാപനമാണ് ചൊവ്വാഴ്ചത്തേത്. നല്ല മണ്‍സൂണ്‍ ലഭിക്കും എന്നുള്ള പ്രവചനവും കാര്‍ഷിക മേഖലയുടെ അഭിവൃദ്ധിയും കണക്കിലെടുത്താണ് നിരക്കുകള്‍ കുറക്കാതിരുന്നത്.

റീട്ടെയില്‍ പണപ്പെരുപ്പ നിരക്ക് 4.83 ശതമാനത്തില്‍ നിന്ന് ഏപ്രിലില്‍ 5.39 ശതമാനമായി വര്‍ധിച്ചിരുന്നു.വരുംനാളുകളില്‍ പണപ്പെരുപ്പതോത് ഉയര്‍ത്താന്‍ ക്രൂഡ് വില വര്‍ധനകാരണമായേക്കാം. ഇതുകൂടി പരിഗണിച്ചാണ് നിരക്കുകള്‍ മാറ്റുന്നില്ല എന്ന് തീരുമാനിച്ചത്.

റിസര്‍വ് ബാങ്ക് ഓഫ് ഇന്ത്യ റിപ്പോ നിരക്ക് ഏപ്രിലില്‍ 0.25% കുറച്ച് 6.5 ശതമാനമാക്കിയിരുന്നു.അഞ്ചു വര്‍ഷത്തെ ഏറ്റവും താഴ്ന്ന നിരക്കായിരുന്നു ഇത്.വായ്പാ പലിശ നിരക്കു നിര്‍ണയത്തെ ഏറ്റവും സ്വാധീനിക്കുന്ന അടിസ്ഥാന നിരക്കാണു റിപ്പോ നിരക്ക്.