മുംബൈ:വിജയ് മല്ല്യയുടെ കിംഗ്ഫിഷര്‍ ഹൗസ് വാങ്ങാന്‍ ആളില്ല. വ്യാഴാഴ്ച നടത്തിയ ലേലത്തിനും കിംഗ്ഫിഷര്‍ ഹൗസ് വാങ്ങാന്‍ താല്‍പര്യം പ്രകടിപ്പിച്ച് ആരുമെത്തിയിട്ടില്ല.

150 കോടിയായിരുന്നു മാര്‍ച്ചില്‍ ലേലം നടത്തുമ്പോള്‍ കിംഗ്ഫിഷര്‍ ഹൗസിന്റെ ആദ്യവില. അന്നാരും എത്താത്തതിനെത്തുടര്‍ന്ന് പ്രാരംഭവില 135 കോടി രൂപയാക്കി നിശ്ചയിച്ച് ലേലം മാറ്റിവെയ്ക്കുകയായിരുന്നു.

മല്ല്യയുടെ സ്വകാര്യ ആഡംബര വിമാനം ഈ മാസം 18ന് ആദായനികുതി വകുപ്പ് ലേലം നടത്തും. എട്ടു കാറുകളും ലേലത്തില്‍ വെയ്ക്കും. വിവിധ മോഡലുകള്‍ക്ക് 90,000 മുതല്‍ 2.5 ലക്ഷം രൂപ വരെയാണ് ബാങ്കുകള്‍ അടിസ്ഥാനവിലയിട്ടിരിക്കുന്നത്. 13.7 ലക്ഷം രൂപ വിലയുള്ള ഓഫീസ് വസ്തുക്കളും ലേലത്തില്‍ വെയ്ക്കും.

9000 കോടിയുടെ വായ്പാതട്ടിപ്പുമായി രാജ്യംവിട്ട വിജയ് മല്യയുടെ ആസ്തികള്‍ ലേലം ചെയ്ത് തുക തിരിച്ചുപിടിക്കാനാണ് രാജ്യത്തെ 17 ബാങ്കുകള്‍ ഉള്‍പ്പെട്ട കണ്‍സോര്‍ഷ്യം ലേലത്തിലൂടെ ശ്രമിക്കുന്നത്.