ന്യൂഡല്‍ഹി: രാജ്യത്തെ ബാങ്കുകളില്‍ നിക്ഷേപം കൂടുന്നു. 500,1000 രൂപ നോട്ടുകള്‍ അസാധുവാക്കിയതോടെ ദിവസങ്ങള്‍ക്കകം 1.5 ലക്ഷം കോടിയുടെ നിക്ഷേപമാണ് ബാങ്കുകളിലുണ്ടായത്.

പുതിയ നോട്ടുകള്‍ക്കായി കൂടുതല്‍ എടിഎമ്മുകള്‍ സജ്ജീകരിച്ചു തുടങ്ങിയിട്ടുണ്ട്. ചില എടിഎമ്മുകളില്‍ ഇതിനായുള്ള മാറ്റങ്ങള്‍ വരുത്തുകയും ചെയ്തിട്ടുണ്ട്. എസ്ബിഐ, ഐസിഐസിഐ, എച്ച്ഡിഎഫ്‌സി, ആക്സിസ് ബാങ്കുകളാണ് എടിഎമ്മുകളെ പുതുക്കി സജ്ജീകരിച്ചത്.

നിലവില്‍ എടിഎമ്മുകളില്‍ 100 രൂപ നോട്ടുകള്‍ മാത്രമാണ് ലഭ്യമാകുന്നത്. രണ്ട് ലക്ഷത്തോളം വരുന്ന എടിഎമ്മുകളില്‍ 1.2 ലക്ഷവും ഇപ്പോള്‍ പ്രവര്‍ത്തിക്കുന്നു. നോട്ട് അസാധുവാക്കല്‍ പ്രഖ്യാപനം വന്ന് മൂന്നു ദിവസത്തിനുള്ളില്‍ നിക്ഷേപം, വിനിമയം, പിന്‍വലിക്കല്‍ തുടങ്ങി എടിഎമ്മുകള്‍ വഴി ഏഴു കോടിയിലധികം ഇടപാടുകള്‍ നടന്നെന്ന് ധനമന്ത്രാലയം ചൂണ്ടിക്കാട്ടിയിരുന്നു.

ഡിസംബര്‍ ആദ്യത്തോടെ എടിഎമ്മുകള്‍ വഴി പുതിയ നോട്ടുകള്‍ വിതരണം ചെയ്യാന്‍ സാധിക്കുമെന്നാണ് കേന്ദ്ര ധനകാര്യ മന്ത്രാലയം അറിയിച്ചിട്ടുള്ളത്.