എസ്ബിഐക്ക് കീഴില്‍ 92,000 കോടി രൂപ

കഴിഞ്ഞ 5 ദിവസം കൊണ്ട് എസ്ബിഐയുടേയും അസ്സോസിയേറ്റ് ബാങ്കുകളിലേയും ഒഴുകി എത്തിയത് 92000 കോടി രൂപയാണ്. ഡിസംബര്‍ 30 നകം രാജ്യത്തെ ബാങ്കുകളില്‍ 4 ലക്ഷം കോടി രൂപയെങ്കിലും അധികം നിക്ഷേപമായി ലഭിക്കുമെന്നാണ് കണക്ക്.

ജനങ്ങളുടെ കൈയില്‍ പണമില്ല

500, ആയിരം രൂപാ നോട്ടുകള്‍ അസാധുവാക്കിയതോടെ ജനങ്ങളുടെ കൈവശമുള്ള പണം കുറഞ്ഞിട്ടുണ്ട്. നിരവധിപേര്‍ കൈവശമുള്ള പണത്തില്‍ നല്ലൊരു പങ്ക് ബാങ്കുകളില്‍ നിക്ഷേപിച്ചു. എസ്ബിഐ മാത്രം ആദ്യത്തെ ഒന്നര ദിവസത്തിനുള്ളില്‍ നേടിയത് 53,000 കോടി രൂപയുടെ നിക്ഷേപമാണ്.

ഉല്‍പന്നങ്ങള്‍ക്ക് വില ഇടിയും

ജനങ്ങള്‍ ചെലവ് ചുരുക്കാന്‍ നിര്‍ബന്ധിതരായതോടെ ഉല്‍്പന്നങ്ങളുടെ വില വിപണിയില്‍ താഴും. നാണയപ്പെരുപ്പം കുറയാനിത് വഴിയൊരുക്കും. അതോടെ, പലിശ നിരക്കുകള്‍ താഴ്ത്താന്‍ റിസര്‍വ് ബാങ്കും നിര്‍ബന്ധിതരാകും.

പലിശ നിരക്ക് കുറയും

ബാങ്കുകളിലെ നിക്ഷേപം വലിയ തോതില്‍ ഉയര്‍ന്ന സാഹചര്യത്തില്‍ നിലവിലുള്ള നിക്ഷേപ പലിശ ബാങ്കുകള്‍ക്ക് നല്‍കാനാകില്ല. നിക്ഷേപ നിരക്കില്‍ കുറവു വരും. മാത്രമല്ല വായ്പ പലിശയും ആനുപാതികമായി കുറക്കേണ്ടി വരും. പലിശ നിരക്ക് ഉടന്‍ കുറയുമെന്ന് എസ്ബിഐ മേധാവി അരുന്ധതി ഭട്ടാചാര്യ മാധ്യമങ്ങളോട് വ്യക്തമാക്കിയിട്ടുണ്ട്.

സാധാരണക്കാര്‍ക്ക് നേട്ടം

സാധാരണക്കാരുടെ ഭവന വായ്പകളുടേയും വാഹന വായ്പകളുടേയും പലിശ കുറയും. ഇതോടെ കൂടുതല്‍ ആളുകള്‍ വായ്പ എടുക്കാന്‍ തയ്യാറാകും. ഇത് വാണിജ്യ വ്യവസായ മേഖലക്ക് പുതിയ ഊര്‍ജമാകുമെന്നാണ് കരുതുന്നത്.