ലക്കി ഗ്രാഹക് യോജ്‌ന

ഡിജിറ്റല്‍ ഇടപാടുകള്‍ നടത്തുന്ന രാജ്യത്തെ ഉപഭോക്താക്കളെ ലക്ഷ്യംവയ്ക്കുന്ന സമ്മാനപദ്ധതിയാണ് ലക്കി ഗ്രാഹക് യോജ്‌ന. ഈ പദ്ധതി പ്രകാരം കേന്ദ്രസര്‍ക്കാര്‍ പ്രതിദിനം 15,000 വിജയികളെ നറുക്കെടുപ്പിലൂടെ കണ്ടെത്തി 1000 രൂപവീതം സമ്മാനം നല്‍കും. ഒരു ലക്ഷം രൂപയാണ് ലക്കി ഗ്രാഹക് യോജ്‌നക്ക് ബമ്പര്‍ സമ്മാനമായി നല്‍കുന്നത്. ഡിസംബര്‍ 25ന് തുടങ്ങുന്ന സമ്മാനപദ്ധതി ഏപ്രില്‍ 13ന് അവസാനിക്കും. ഏപ്രില്‍ 14ന് നടത്തുന്ന മെഗാ ബമ്പര്‍ നറുക്കെടുപ്പിലൂടെ തിരഞ്ഞെടുക്കപ്പെടുന്ന ഒന്നാം സമ്മാനവിജയിക്ക് ഒരു കോടി രൂപയാണ് സമ്മാനമായി ലഭിക്കുന്നത്. രണ്ടാം സമ്മാനവിജയിക്ക് 50ലക്ഷവും, മൂന്നാം സമ്മാനവിജയിക്ക് 25ലക്ഷം രൂപയും ലഭിക്കും.

ഡിജി ധന്‍ വ്യാപാരി യോജ്‌ന

പണരഹിത ഇടപാടുകള്‍ കൂടുതലായി നടത്തുന്ന വ്യാപരികളെ ഉന്നവെച്ചാണ് ഡിജി ധന്‍ വ്യാപരി യോജ്‌ന പ്രഖ്യാപിച്ചിരിക്കുന്നത്. ആഴ്ച്ചതോറും നടക്കുന്ന നറുക്കെടുപ്പിലൂടെ 7000 വ്യാപാരികള്‍ക്ക് 1500 രൂപ മുതല്‍ 50,000 രൂപവരെ സമ്മാനതുകയായി നല്‍കും. ഈ പദ്ധതിയിലെ മെഗാബമ്പര്‍ സമ്മാനം 50 ലക്ഷം രൂപയാണ്. രണ്ടാം സമ്മാനം നേടുന്ന വിജയിക്ക് 25 ലക്ഷം രൂപയും, മൂന്നാം സമ്മാനവിജയിക്ക് 5 ലക്ഷം രൂപയുമാണ് സമ്മാനമായി നല്‍കുന്നത്.

യുപിഐ, യുഎസ്എസ്ഡി എന്നിവ ആധാറുമായി ബന്ധപ്പെടുത്തി ഡിജിറ്റല്‍ ഇടപാട് നടത്തുന്നവര്‍ക്ക് മാത്രമേ സര്‍ക്കാര്‍ പ്രഖ്യാപിച്ചിരിക്കുന്ന ഈ സമ്മാനപദ്ധതികളില്‍ പങ്കെടുക്കാന്‍ സാധിക്കൂ.

എന്‍പിസിഐ?

കേന്ദ്രസര്‍ക്കാരിന്റെ കറണ്‍സിരഹിത സമ്പദ് വ്യവസ്ഥയെന്ന ലക്ഷ്യത്തിന് നേതൃത്വം നല്‍കുന്നത് നാഷണല്‍ പേമെന്റ് കോര്‍പ്പറേഷന്‍ ഓഫ് ഇന്ത്യയാണ്. രാജ്യത്തെ ഡിജിറ്റല്‍ പണമിടപാടുകാര്‍ക്കായി സമ്മാനപദ്ധതി ഏര്‍പ്പെടുത്താന്‍ എന്‍പിസിഐയെ ആണ് നീതി ആയോഗ് ഏല്‍പ്പിച്ചിരിക്കുന്നത്. മുന്‍നിര ബാങ്കുകളായ എസ്ബിഐ, ഐസിഐസിഐ, കാനറാ ബാങ്ക്, പഞ്ചാബ് നാഷണല്‍ ബാങ്ക് എന്നിവയാണ് എന്‍പിസിഐയുടെ പ്രമോട്ടര്‍മാര്‍.