ലോകത്തിലെ ഏറ്റവും ശക്തമായ പാസ്‌പോര്‍ട്ട് ജര്‍മ്മനിയുടേത്. ജര്‍മ്മന്‍ പാസ്‌പോര്‍ട്ടുമായി വിസയില്ലാതെ 157 രാജ്യങ്ങളില്‍ സഞ്ചരിക്കാം. പാസ്‌പോര്‍ട്ട് ഇന്‍ഡെക്‌സില്‍ ഇന്ത്യ 78-ാം സ്ഥാനത്താണ്. ഇന്ത്യന്‍ പാസ്‌പോര്‍ട്ട് ഉപയോഗിച്ച് 46 രാജ്യങ്ങള്‍ മാത്രമാണ് സന്ദര്‍ശിക്കാന്‍ സാധിക്കുക. വിവിധ രാജ്യങ്ങളുടെ പാസ്‌പോര്‍ട്ടുകളുപയോഗിച്ച് വിസയില്ലാതെ സഞ്ചരിക്കാന്‍ കഴിയുന്ന രാജ്യങ്ങളുടെ അടിസ്ഥാനത്തില്‍ ആര്‍ട്ടോണ്‍ ക്യാപ്പിറ്റല്‍സാണ് ഗ്ലോബല്‍ റാങ്കിംഗ് പാസ്‌പോര്‍ട്ട് ഇന്‍ഡക്‌സ് തയറാക്കിയിരിക്കുന്നത്.

സ്വീഡനും സിംഗപ്പൂരുമാണ് പട്ടികയില്‍ രണ്ടാം സ്ഥാനത്ത്. ഈ രാജ്യങ്ങളുടെ പാസ്‌പോര്‍ട്ട് ഉപയോഗിച്ച് വിസയില്ലാതെ 156 രാജ്യങ്ങള്‍ സന്ദര്‍ശിക്കാം. അഫ്ഗാനിസ്ഥാനാണ് ഏറ്റവും പിന്നില്‍. 23 വിസ-ഫ്രീ സ്‌കോര്‍ മാത്രമാണ് അഫ്ഗാന്‍ നേടിയത്.
ഏഷ്യന്‍ രാജ്യങ്ങളില്‍ സിംഗപ്പൂരിന് പിന്നിലായി മലേഷ്യ, ദക്ഷിണ കൊറിയ, ഹോങ്കോംഗ്, തായ് വാന്‍ തുടങ്ങിയ രാജ്യങ്ങളുണ്ട്. യുകെ, ഫ്രാന്‍സ്, സ്‌പെയിന്‍, സ്വിറ്റ്‌സര്‍ലന്‍ഡ് തുടങ്ങിയ രാജ്യങ്ങളിലെ പാസ്‌പോര്‍ട്ട് ഉപയോഗിച്ച് വിസയില്ലാതെ 155 രാജ്യങ്ങള്‍ സന്ദര്‍ശിക്കാം. ചൈന 58-ാം സ്ഥാനത്താണ്. പാക്കിസ്ഥാന്‍ 94-ാം സ്ഥാനത്താണ്. നേപ്പാള്‍, ശ്രീലങ്ക തുടങ്ങിയ രാജ്യങ്ങള്‍ ഏറ്റവും പിന്നിലാണ്.