അസാധുവാതക്കിയ പഴയ 500, 1000 രൂപ കറന്‍സി നോട്ടുകള്‍ പത്തെണ്ണത്തിലധകം കൈവശം വയ്ക്കുന്നത് ശിക്ഷാര്‍ഹമാണെന്നുള്ള ബില്‍ ലോക് സഭയില്‍ അവതരിപ്പിച്ചു.

പഴയ നോട്ടുകള്‍ ഉപയോഗിക്കുന്ന സമാന്തര സമ്പദ് വ്യവസ്ഥയെ ഇല്ലാതാക്കുന്നതിന്റെ ഭാഗമായാണ് ഇത്. ഈ ബില്‍ പ്രകാരം പിന്‍വലിച്ച പഴയ 500, 1000 രൂപാ നോട്ടുകള്‍ പത്തെണ്ണത്തിലധികം കൈവശം സൂക്ഷിച്ചാല്‍ കുറഞ്ഞത് 10,000 രൂപ വരെ പിഴ ലഭിക്കുന്ന കുറ്റമാണ്. പതിനായിരം രൂപയോ, അല്ലെങ്കില്‍ കൈവശം വച്ച പണത്തിന്റെ അഞ്ചിരട്ടിയോ ആയിരിക്കും പിഴയായി ഈടാക്കുന്നത്. കൂടാതെ നിരോധിക്കപ്പെട്ട നോട്ടുകള്‍ നിശ്ചിത കാലാവധി അവസാനിച്ച ശേഷവും സൂക്ഷിക്കുന്നവര്‍ക്ക് നാല് വര്‍ഷം വരെ തടവും അനുഭവിക്കേണ്ടി വരും.

അസാധു നോട്ടുകള്‍ മാറ്റിയെടുക്കാന്‍ അനുവദിച്ചിരുന്ന കാലയളവില്‍ വിദേശത്തായിരുന്നവര്‍ക്ക് 2017 മാര്‍ച്ച് 31 വരെ ഈ നോട്ടുകള്‍ മാറ്റിയെടുക്കാന്‍ സാധിക്കും. എന്നാല്‍ ഈ ആനുകൂല്യം നേടാനായി വ്യാജ സത്യവാങ്മൂലം നല്‍കുന്നവര്‍ക്കും പിഴ ഈടാന്‍ ബില്ലില്‍ വ്യവസ്ഥ ചെയ്യുന്നുണ്ട്. അയ്യായിരം രൂപയോ കൈവശം വച്ച തുകയുടെ അഞ്ചിരട്ടിയോ ആയിരിക്കും തെറ്റായ വിവരങ്ങള്‍ നല്‍കുന്നതിനുള്ള പിഴ.

അസാധുവാക്കിയ കറന്‍സി നോട്ടുകളില്‍ നിന്ന് കേന്ദ്ര സര്‍ക്കാറിനും റിസര്‍വ്വ് ബാങ്കിനും ഉത്തരവാദിത്വം ഒഴിയാന്‍ വേണ്ടിയാണ് ബില്‍. 1978ലും സമാനമായ ഓര്‍ഡിനന്‍സ് കേന്ദ്ര സര്‍ക്കാര്‍ പുറത്തിറക്കിയിരുന്നു. അന്ന് ആയിരം, അയ്യായിരം, പതിനായിരം രൂപയുടെ നോട്ടുകള്‍ കൈവശം വയ്ക്കുന്നവര്‍ക്കായിരുന്നു പിഴശിക്ഷ.