വാട്‌സ് ആപ്പിലൂടെ കള്ളം പറയുന്നവര്‍ക്ക് ഇനി എട്ടിന്റെ പണി കിട്ടും. വാട്‌സ് ആപ്പ് ഉപയോക്താക്കളുടെ ലോക്കേഷന്‍ കണ്ടെത്തുന്നതിനുള്ള പുത്തന്‍ ഫീച്ചറാണ് വാട്‌സ് ആപ്പ് അവതരിപ്പിക്കാനൊരുങ്ങുന്നത്. വൈകാതെ തന്നെ നമ്മുടെ സുഹൃത്തുക്കളും ബന്ധുക്കളും എവിടെ ഇരുന്നാണ് വാട്‌സ് ആപ്പില്‍ മെസേജുകള്‍ അയക്കുന്നതെന്ന് ഏളുപ്പത്തില്‍ മനസിലാക്കാം.

ആന്‍ഡ്രോയിഡ് 2.16.399, ഐഒഎസ് 2.17.3.28 ബീറ്റാ വെര്‍ഷനുകളിലാണ് പുതിയ ഫീച്ചര്‍ ലഭ്യമാവുക. നിലവില്‍ വാട്‌സ് ആപ്പ് ഉപയോഗിക്കുന്നവര്‍ക്ക് ലോക്കേഷന്‍ ഷെയര്‍ ചെയ്യാനുള്ള ഫീച്ചര്‍ കമ്പനി അവതരിപ്പിച്ചിട്ടുണ്ട്. എന്നാല്‍ അതില്‍ ലൈവായി ലോക്കേഷന്‍ ഷെയര്‍ ചെയ്യാനുള്ള സൗകര്യമില്ല. ഇതു കൂടി ഉള്‍പ്പെടുത്തിയാവും വാട്‌സ് ആപ്പിന്റെ ബീറ്റ വെര്‍ഷന്‍ കമ്പനി അവതരിപ്പിക്കുക.പുതിയ ഫീച്ചര്‍ ലഭിക്കുന്നതിനായി ഉപഭോക്താക്കള്‍ വാട്‌സ് ആപ്പ് ഡൗണ്‍ലോഡ് ചെയ്തതിന് ശേഷം ലൈവ് ലോക്കേഷന്‍ ഷെയറിംഗ് ആക്ടീവ് ചെയ്യണം. എത്ര സമയത്തേക്കാണ് ലൈവ് ലോക്കേഷന്‍ ഷെയറിംഗ് നല്‍കേണ്ടതെന്നും ഉപയോക്താക്കള്‍ക്ക് തീരുമാനിക്കാം.

വാട്‌സ് ആപ്പില്‍ മെസേജുകള്‍ അയച്ചതിന് ശേഷം എഡിറ്റ്, ഡിലീറ്റ് ചെയ്യാനുള്ള ഫീച്ചറുകള്‍ അവതരിപ്പിക്കുമെന്ന് പറഞ്ഞിരുന്നു. ഇതിന് പിന്നാലെയാണ് പുതിയ ഫീച്ചറുമായി വാട്‌സ് ആപ്പ് രംഗത്തെത്തുന്ന വിവരം അമേരിക്കയിലെ പ്രമുഖ ടെക്‌നോളജി വെബ്‌സൈറ്റ് പുറത്ത് വിട്ടിരിക്കുന്നത്.