പ്രവാസികളുടെ പെന്‍ഷന്‍ തുക നാലിരട്ടിയായി ഉയര്‍ത്തുമെന്ന് ധനമന്ത്രി ബജറ്റില്‍ പ്രഖ്യാപിച്ചു. 500 ല്‍നിന്ന് 2000 രൂപയായാണ് പ്രവാസി പെന്‍ഷന്‍ ഉയര്‍ത്തിയിരിക്കുന്നത്. കൂടാതെ, പ്രവാസികള്‍ക്കായി കെഎസ്എഫ്ഇ ചിട്ടിയും ഇന്‍ഷുറന്‍സ് പാക്കേജും ലോകകേരള സഭാ രൂപീകരണവും ധനമന്ത്രി തോമസ് ഐസക ബജറ്റില്‍ പ്രഖ്യാപിച്ചിട്ടുണ്ട്.

സംസ്ഥാനത്തെ അടിസ്ഥാന സൗകര്യ വികസന പദ്ധതികള്‍ക്കായാണ് കിഫ്ബി(കേരള ഇന്‍ഫ്രാസ്ട്രക്ചര്‍ ഇന്‍വെസ്റ്റ്മെന്റ് ഫണ്ട് ബോര്‍ഡ്)രൂപീകരിച്ചത്. കിഫ്ബിക്ക് പണം സമാഹരിക്കാനായി പ്രവാസി ചിട്ടി പദ്ധതി ആരംഭിക്കുമെന്നും തോമസ് ഐസക്ക് പറഞ്ഞു. പേയ്മെന്റ് ഗേറ്റ് വേ വഴി പ്രവാസികള്‍ക്കു ചിട്ടിയില്‍ പണമടയ്ക്കാന്‍ കഴിയും. പ്രവാസികളുടെ സമ്പാദ്യം കിഫ്ബിയില്‍ നിക്ഷേപിക്കുന്നതിന് സര്‍ക്കാര്‍ ഗ്യാരണ്ടി ഉറപ്പാക്കുകയും ചെയ്യും.

സമ്പാദ്യത്തോടൊപ്പം കേരളത്തിലെ വികസത്തില്‍ പങ്കാളിയാകാന്‍ പ്രവാസികള്‍ക്ക് ഇതിലൂടെ അവസരം ലഭിക്കും. കെഎസ്എഫ്ഇ വഴി 12000 കോടി കിഫ്ബിയിലേക്ക് സമാഹരിക്കാനാണ് സര്‍ക്കാര്‍ ലക്ഷ്യമിടുന്നത്.