സംസ്ഥാനത്ത് സ്വര്‍ണ വില വര്‍ദ്ധിച്ചു. പവന് 120 രൂപയാണ് ഇന്ന് കൂടിയത്. പവന് 21,960 രൂപയും ഗ്രാമിന് 15 രൂപ കൂടി 2,745 രൂപയുമാണ് നിരക്ക്. 31 ഗ്രാമിന്റെ ട്രോയ് ഔണ്‍സിന് 1,256 ഡോളറാണ് ആഗോള വിപണിയിലെ നിരക്ക്. അന്താരാഷ്ട്ര വിപണിയിലെ വില വര്‍ദ്ധനവാണ് കേരളത്തിലും സ്വര്‍ണ വില ഉയര്‍ത്തിയത്.

വിദേശ വിപണിയിലെ വിലക്കയറ്റത്തിന്റെ ചുവടൊപ്പിച്ചാണ് ആഭ്യന്തര വിപണിയിലെ വില വര്‍ദ്ധന. വിവാഹക്കാലമായതിനാല്‍ ആവശ്യക്കാര്‍ ഏറിയതും വില വര്‍ദ്ധനക്കു കാരണമാണ്. അമേരിക്കന്‍ പ്രസിഡന്റ് തെരഞ്ഞെടുപ്പും കറന്‍സി നോട്ട് പ്രതിസന്ധിയും കാരണം വന്‍ തിരിച്ചടി നേരിട്ട സ്വര്‍ണവിപണിയില്‍ വന്‍ ഉണര്‍വാണ് കാണുന്നത്. കഴിഞ്ഞ മാസത്തെ തളര്‍ച്ചയില്‍ നിന്നും കരകയറിയ സ്വര്‍ണത്തിന്റെ വില ഇനിയും വര്‍ദ്ധിക്കാനാണ് സാധ്യത. വിവാഹ സീസണായതിനാല്‍ ആഭ്യന്തര വിപണിയിലും സ്വര്‍ണ്ണത്തിന് ആവശ്യക്കാര്‍ ഏറിയിട്ടുണ്ട്. മാത്രമല്ല നോട്ട് നിരോധനത്തിന്റെ പ്രതിഫലനങ്ങളില്‍ അയഞ്ഞതോടെ സ്വര്‍ണ്ണവില ഉയരുമെന്നാണ് കരുതപ്പെടുന്നത്.

ഡിസംബര്‍ മാസം സ്വര്‍ണ്ണം പവന് 20,480 രൂപ വരെ വില ഇടിഞ്ഞിരുന്നു. 2017 ആരംഭിച്ചതോടെ സ്വര്‍ണവിലയില്‍ വര്‍ദ്ധനവ് രേഖപ്പെടുത്താന്‍ തുടങ്ങി. ജനുവരി ഒന്നിലെ സ്വര്‍ണവില 21,160 രൂപയായിരുന്നു. ഇത് പതിനഞ്ച് ദിവസം കൊണ്ട് 840 രൂപ ഉയര്‍ന്ന് 22,000ത്തിലെത്തിയിരുന്നു. ഫെബ്രുവരിയില്‍ വീണ്ടും സ്വര്‍ണവിപണിയിലെ ഉയര്‍ച്ച താഴ്ച്ചകള്‍ കണ്ടു.