ആദായ നികുതി റിട്ടേണുകള് സമര്പ്പിക്കാനുള്ള കാലാവധി ഇന്ന് അവസാനിക്കും. ഇന്ന് അര്ദ്ധരാത്രിവരെ റിട്ടേണ് നല്കാമെന്ന് ധനമന്ത്രാലയം പുറത്തിറക്കിയ പ്രസ്താവനയിൽ പറയുന്നു.
ആധാർ ഇല്ലാത്തവർക്കും നേരിട്ട് ആദായ നികുതി റിട്ടേണുകൾ സമർപ്പിക്കാമെന്ന് ഹൈക്കോടതി ഇന്നലെ ഇടക്കാല ഉത്തരവ് പ്രഖ്യാപിച്ചു. ആദായ നികുതി അടയ്ക്കാനുള്ള സമയ പരിധി അവസാനിക്കാൻ ഒരു ദിവസം ബാക്കി നിൽക്കെയായിരുന്നു ഹൈക്കോടതിയുടെ ഉത്തരവ്. ഇൻകംടാക്സ് ആക്ടിലെ ഭേദഗതി ചോദ്യം ചെയ്തുള്ള ഹർജിയിലാണ് ഉത്തരവ്.
incometaxindiaefiling.gov.in എന്ന വെബ് സൈറ്റിലാണ് ആദായനികുതി റിട്ടേൺ ഫയൽ ചെയ്യേണ്ടത്. റിട്ടേൺ ഫയൽ ചെയ്യുന്നതിന് ആധാർ നമ്പരും പാൻ നമ്പരുമായി ലിങ്ക് ചെയ്യണം. ഓൺലൈൻ വഴി ആദായ നികുതി റിട്ടേൺ സമർപ്പിക്കുമ്പോൾ ആധാർ നമ്പർ ഇല്ലെങ്കിൽ അപേക്ഷയുടെ നമ്പർ നൽകണമെന്ന് അറിയിച്ചിരുന്നു. എന്നാൽ പുതിയ സാഹചര്യത്തിൽ ഇത് ഒഴിവാകും.
ജൂലൈ 31 വരെയായിരുന്നു നികുതി റിട്ടേൺ ഫയൽ ചെയ്യുന്നതിനുള്ള അവസാന തീയതി. എന്നാൽ തിരക്കുമൂലം ആദായനികുതി വകുപ്പിന്റെ വെബ്സൈറ്റിന്റെ പ്രവർത്തനം നിലച്ചതോടെ സമയപരിധി അഞ്ച് ദിവസത്തേയ്ക്ക് കൂടി നീട്ടുകയായിരുന്നു.
malayalam.goodreturns.in