ഓഹരി വിപണിയിൽ ഇന്ന് ദീപാവലി മുഹൂർത്ത വ്യാപാരം. ബിഎസ്ഇയിലും എൻഎസ്ഇയിലും വൈകിട്ട് 6.30 മുതൽ 7.30 വരെയാണ് മുഹൂർത്ത വ്യാപാരം നടക്കുക.

പ്രീ-ഓപ്പണിങ് സെഷൻ 6.15-ന് തുടങ്ങും. ദീപാവലിയുടെ ഭാഗമായ ലക്ഷ്മിപൂജ പ്രമാണിച്ച് അവധിയായതിനാൽ ഇന്ന് സാധാരണ ഗതിയിലുള്ള വ്യാപാരം ഉണ്ടായിരിക്കില്ല. വെള്ളിയാഴ്ചയും സ്റ്റോക് എക്സ്‌ചേഞ്ചുകൾക്ക് അവധിയാണ്.

ഓഹരിവില സൂചികകളായ സെൻസെക്സും നിഫ്റ്റിയും സംവത് 2073ൽ സർവകാല ഉന്നതിയിൽ എത്തുകയുണ്ടായി. വിപണിയിലെ മുന്നേറ്റത്തിന് എക്കാലത്തും നേതൃത്വം നൽകിയിരുന്നതു വിദേശ ധനസ്ഥാപനങ്ങളായിരുന്നെങ്കിൽ സംവത് 2073ൽ രാജ്യത്തെ തന്നെ ധനസ്ഥാപനങ്ങളും ചില്ലറ നിക്ഷേപകരുമാണ് മുൻനിരയിലുണ്ടായിരുന്നത്.

സംവത് 2074ലെ വ്യാപാരത്തിനു തുടക്കം കുറിക്കുമ്പോൾ വിപണിക്ക് ആത്മവിശ്വാസം പകരുന്നതും ഇതുതന്നെയാണെന്ന് നിരീക്ഷകർ വിലയിരുത്തുന്നു. മ്യൂച്വൽ ഫണ്ടുകളുടെ ഓഹരി നിക്ഷേപ പദ്ധതികളിൽ വൻ കുതിപ്പ് രേഖപ്പെടുത്തിയതും നേരിട്ടുള്ള നിക്ഷേപത്തിൽ ചില്ലറ നിക്ഷേപകരിൽ നിന്ന് മികച്ച പിന്തുണ ലഭിക്കുന്നതും സംവത് 2074 വിപണിക്ക് പ്രതീക്ഷ നൽകുന്ന കാര്യങ്ങളാണ്.

malayalam.goodreturns.in