നികുതിദായകരുടെ സംശയങ്ങൾക്ക് മറുപടി നൽകാൻ ആദായ നികുതി വകുപ്പ് ഓൺലൈൻ ചാറ്റ് സംവിധാനം പുറത്തിറക്കി. പ്രത്യക്ഷ നികുതി സംബന്ധിച്ച നികുതിദായകരുടെ പൊതുവായ സംശയങ്ങൾക്ക് ഓൺലൈനിലൂടെ വിദ​ഗ്ധർ മറുപടി നൽകുന്ന സംവിധാനമാണിത്.

ആദായ നികുതി വകുപ്പിന്റെ ഔദ്യോ​ഗിക വെബ്സൈറ്റിലാണ് ഓൺലൈൻ ചാറ്റ് സംവിധാനമുള്ളത്. ഇവിടെ നികുതിദായകർക്ക് തങ്ങളുടെ സംശയങ്ങൾ ചോദിക്കാം.

വെബ്സൈറ്റിലെത്തുന്നവർക്ക് ഇ-മെയിൽ ഐഡി ഉപയോ​ഗിച്ച് ഓൺലൈൻ ചാറ്റിൽ പ്രവേശിക്കാനാകും. പിന്നീട് ​ഗസ്റ്റ് എന്ന നിലയിൽ വിദ​ഗ്ധരോട് സംശയങ്ങൾ ചോദിക്കാം. സംസാരിക്കുന്ന കാര്യങ്ങൾ ഭാവിയിലേക്കുള്ള ഉപയോ​ഗത്തിനായി നികുതിദായകന്റെ ഇ-മെയിലേയ്ക്ക് അയയ്ക്കാനുള്ള സംവിധാനവും ഇതിലുള്ളതായി നികുതി വിഭാ​ഗം ഉദ്യോ​ഗസ്ഥർ വ്യക്തമാക്കി.

ജനങ്ങളുടെ പ്രതികരണം അറിഞ്ഞ ശേഷം ഈ സംവിധാനത്തിൽ കൂടുതൽ മാറ്റങ്ങൾ വരുത്താനുള്ള തീരുമാനത്തിലാണ് ആദായ നികുതി വകുപ്പ്. മികച്ച പ്രതികരണമാണെങ്കിൽ കൂടുതൽ സൗകര്യങ്ങൾ ഓൺലൈൻ ചാറ്റിൽ ഉൾപ്പെടുത്താനാണ് സാധ്യത.

malayalam.goodreturns.in