പ്രവര്‍ത്തന മൂലധനം കണ്ടത്തുന്നതിന്റെ ഭാഗമായി എയര്‍ ഇന്ത്യ 1500 കോടി രൂപ ഹ്രസ്വകാല വായ്പയെടുക്കാന്‍ ഒരുങ്ങുന്നു. സാമ്പത്തിക പ്രതിസന്ധി മറികടക്കുന്നതിനായി എയര്‍ ഇന്ത്യയുടെ ഓഹരികള്‍ വിറ്റഴിക്കാനിരിക്കെയാണ് വായ്പയെടുക്കാനുള്ള നീക്കം.

കഴിഞ്ഞ 18 ന് ഇതുസംബന്ധിച്ച വിവരങ്ങള്‍ എയര്‍ ഇന്ത്യ പുറത്തുവിട്ടിരുന്നു. 2018 ജൂണ്‍ 27 വരെ എയര്‍ ഇന്ത്യയ്ക്ക് വായ്പ നല്‍കുന്നതിന് കേന്ദ്രസര്‍ക്കാര്‍ ഗ്യാരന്റി നല്‍കും.

ഒക്ടോബര്‍ 26 നകം പണം കണ്ടെത്താനാണ് എയര്‍ ഇന്ത്യയുടെ ശ്രമം. ഇതിനായി ബാങ്കുകൾക്ക് കത്തയച്ചു കഴിഞ്ഞു. വായ്പയായി വന്‍ തുക നല്‍കാന്‍ തയ്യാറുണ്ടോ എന്ന് വ്യക്തമാക്കണമെന്നാണ് കത്തിൽ ആവശ്യപ്പെട്ടിരിക്കുന്നത്.

കഴിഞ്ഞ മാസവും 3250 കോടി രൂപയുടെ ഹ്രസ്വകാല വായ്പയെടുക്കാന്‍ എയര്‍ ഇന്ത്യ തീരുമാനിച്ചിരുന്നു. എന്നാല്‍ ബാങ്കുകളില്‍ നിന്ന് അനുകൂലമായ പ്രതികരണം ഉണ്ടാകാത്തതിനെ തുടർന്ന് ഇത് പ്രാവര്‍ത്തികമായില്ല. നിലവില്‍ എയര്‍ ഇന്ത്യയുടെ കടബാധ്യത 50,000 കോടി രൂപയാണ്.

malayalam.goodreturns.in