ആദായനികുതി നിയമം പരിഷ്ക്കരിക്കാൻ കേന്ദ്ര സർക്കാർ തീരുമാനം. ഇതിനായുള്ള കരട് നിർദേശങ്ങൾ തയ്യാറാക്കാൻ ആറംഗസമിതിയെ നിയോഗിച്ചു. കരട് നിർദേശങ്ങൾ ആറു മാസത്തിനകം സമര്‍പ്പിക്കാനാണ് സമിതിയോട് ആവശ്യപ്പെട്ടിട്ടുള്ളത്.

അമ്പത് വർഷം പഴക്കമുള്ളതാണ് രാജ്യത്തെ നിലവിലെ ആദായ നികുതി നിയമം. ഇത് രാജ്യത്തിന്റെ പുതിയ സാമ്പത്തിക ആവശ്യങ്ങള്‍ക്കനുസരിച്ച് പരിഷ്‌കരിക്കുകയാണ് സർക്കാരിന്റെ ലക്ഷ്യം.

കേന്ദ്ര പ്രത്യക്ഷ നികുതി ബോര്‍ഡംഗം അര്‍ബിന്ദ് മോദിയാണ് സമിതി അധ്യക്ഷന്‍. മുഖ്യ സാമ്പത്തിക ഉപദേഷ്ടാവായ അരവിന്ദ് സുബ്രഹ്മണ്യന്‍ സമിതിയുടെ സ്ഥിരം ക്ഷണിതാവായിരിക്കും. ഗിരീഷ് അഹൂജ, രാജീവ് മേമാനി, മാന്‍സി കെഡിയ എന്നിവരും സമിതിയില്‍ അംഗങ്ങളാകും.

നികുതി സമ്പ്രദായം ലളിതമാക്കുന്നതിനായി ആദായനികുതി നിയമം പരിഷ്‌കരിക്കാന്‍ 2009-ല്‍ യു.പി.എ. സര്‍ക്കാര്‍ പ്രത്യക്ഷനികുതി കോഡ് കൊണ്ടുവന്നിരുന്നു. 2010-ല്‍ പ്രത്യക്ഷ നികുതി കോഡ് ബില്‍ പാര്‍ലമെന്റില്‍ അവതരിപ്പിച്ചു. എന്നാല്‍, പതിനഞ്ചാം ലോക്‌സഭ പിരിച്ചുവിട്ടതോടെ ബില്‍ അസാധുവായി.

malayalam.goodreturns.in