അടുത്ത സാമ്പത്തിക വര്‍ഷം ഇന്ത്യയുടെ ജിഡിപി 7.3 ശതമാനം വളര്‍ച്ചാ നിരക്ക് കൈവരിക്കുമെന്ന് വേള്‍ഡ് ബാങ്ക്. 2019-20 സാമ്പത്തിക വര്‍ഷം ജിഡിപി വളര്‍ച്ച 7.5 ശതമാനത്തിലേക്ക് ഉയരുമെന്ന് വേള്‍ഡ് ബാങ്കിന്റെ ദ്വൈവാര്‍ഷിക പ്രസിദ്ധീകരണമായ ഇന്ത്യ ഡെവലപ്പ്‌മെന്റ് അപ്‌ഡേറ്റിൽ വ്യക്തമാക്കുന്നു.

കണക്കുകള്‍ സഹിതമാണ് ഇക്കാര്യം പ്രസിദ്ധീകരിച്ചിരിക്കുന്നത്. നോട്ട് നിരോധനവും ജി.എസ്ടി നടപ്പാക്കലും താല്‍ക്കാലികമായി രാജ്യം നേരിട്ട തിരിച്ചടികളാണെന്നും ഇത് മറികടന്നുവെന്നുമുള്ള സൂചനകളാണ് റിപ്പോര്‍ട്ടിൽ ഉള്ളത്.

2017 പകുതിയോടെ നോട്ട് നിരോധനത്തിന് മുമ്പുള്ളതു പോലെ തന്നെ പണ ലഭ്യത കൈവരിച്ചു. ഇത് രാജ്യത്തിന്റെ വളർച്ചയെ സ്വാധീനിക്കുന്ന ഘടകമാണെന്നും റിപ്പോർട്ട് വ്യക്തമാക്കുന്നു.

എട്ടു ശതമാനത്തിലധികം ജിഡിപി വളര്‍ച്ച കൈവരിക്കണമെങ്കില്‍ സാമ്പത്തിക പരിഷ്‌കാരത്തിന്റെ വ്യാപ്തി വിപുലപ്പെടുത്തണമെന്നും കയറ്റുമതി രംഗത്തെ കൂടുതല്‍ മത്സരാധിഷ്ഠിതമാക്കണമെന്നും വേള്‍ഡ് ബാങ്ക് റിപ്പോര്‍ട്ടില്‍ വ്യക്തമാക്കുന്നു. ഒക്ടോബർ - ഡിസംബർ കാലയളവിൽ കാർഷിക, നിർമ്മാണ മേഖലകളിൽ മികച്ച പ്രകടനം കാഴ്ച വച്ച ഇന്ത്യൻ സമ്പദ്ഘടന കഴിഞ്ഞ അഞ്ച് പാദങ്ങളിലെ മികച്ച വളർച്ചയാണ് നേടിയത്.

malayalam.goodreturns.in