എച്ച്ഡിഎഫ്സി ബാങ്ക് വായ്പ പലിശ നിരക്ക് ഉയ‍ർത്തി. എല്ലാ കാലാവധിയിലുള്ള വായ്പകൾക്കും 10 ബേസിസ് പോയിന്റാണ് ഉയ‍ർത്തിയിരിക്കുന്നത്.

റിസർവ് ബാങ്ക് റിപ്പോ, റിവേഴ്സ് റിപ്പോ നിരക്കുകൾ 25 ബേസിസ് പോയിന്റ് ഉയർത്തിയതിന് പിന്നാലെയാണ് എച്ച്ഡിഎഫ്സി ബാങ്ക് പലിശ നിരക്ക് ഉയ‍ർത്തിയത്. ഇന്നലെ മുതൽ പുതിയ നിരക്ക് പ്രാബല്യത്തിൽ വന്നു. ഇതോടെ ഇന്ത്യയിലെ ഏറ്റവും വലിയ സ്വകാര്യ ബാങ്കായ എച്ച്ഡിഎഫ്സിയുടെ വായ്പ പലിശ നിരക്ക് 8.40% ആയി ഉയ‍ർന്നു.

സ്റ്റേറ്റ് ബാങ്ക് ഓഫ് ഇന്ത്യയുടെ പലിശ നിരക്ക് 8.15 ശതമാനമാണ്. മൂന്ന് വർഷം കാലാവധിയുള്ള വായ്പയ്ക്ക് എച്ച്ഡിഎഫ്സി ഈടാക്കുന്നത് 8.7 ശതമാനവും എസ്ബിഐ ഈടാക്കുന്നത് 8.25 ശതമാനവുമാണ്. ഒരു മാസം കാലാവധിയുള്ള ലോണിന് 8.05 ശതമാനവും ആറ് മാസം കാലാവധിയുള്ള വായ്പയ്ക്ക് 8.25 ശതമാനവും പലിശ നിരക്ക് ഈടാക്കും.

എസ്ബിഐ, പഞ്ചാബ് നാഷണൽ ബാങ്ക്, ഐസിഐസിഐ ബാങ്ക് എന്നിവ ആ‍‍ർബിഐ വായ്പാനയം പ്രഖ്യാപിക്കുന്നതിന് മുമ്പ് തന്നെ പലിശ നിരക്ക് ഉയ‍ർത്തിയിരുന്നു. റിപ്പോ നിരക്ക് 6ൽ നിന്നും 6.25 ശതമാനമായാണ് ഉയർത്തിയത്. നാല് വർഷത്തിന് ശേഷമാണ് റിസർവ് ബാങ്ക് പലിശ നിരക്ക് ഉയർത്തുന്നത്.

malayalam.goodreturns.in