സ്റ്റേറ്റ് ബാങ്ക് ഓഫ് ഇന്ത്യയുടെ മാനേജിങ് ഡയറക്ടറായി അരിജിത് ബസുവിനെ നിയമിച്ചു. 2020 ഒക്ടോബർ വരെ അദ്ദേഹം ഈ പദവിയിൽ തുടരും. നിലവിൽ സ്റ്റേറ്റ് ബാങ്ക് ഓഫ് ഇന്ത്യയുടെ കോർപറേറ്റ് അക്കൗണ്ട്സ് മാനേജിങ് ഡയറക്ടറായിരുന്നു ഇദ്ദേഹം.
മുമ്പ് എസ്ബിഐ ലൈഫ് ഇൻഷുറൻസ് കമ്പനിയുടെ സിഇഒയും എംഡിയും ആയിരുന്നു. രണ്ടു മാസങ്ങൾക്ക് മുമ്പാണ് ഇദ്ദേഹം എസ്ബിഐയിൽ തിരിച്ചെത്തിയത്. എസ്ബിഐ നിയമം അനുസരിച്ച്, ബാങ്കിന് നാല് മാനേജിംഗ് ഡയറക്ടർമാർ വരെയാകാം.
രണ്ട് ദിവസം മുമ്പ് എസ്ബിഐ മാനേജിംഗ് ഡയറക്ടർ ബി ശ്രീറാമിനെ മൂന്നു മാസക്കാലാവധിയിലേയ്ക്ക് താത്കാലികമായി ഐഡിബിഐ ബാങ്കിന്റെ ചീഫ് ആയി നിയമിച്ചിരുന്നു. ഐഡിബിഐ ബാങ്കിന്റെ മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായി ശ്രീറാം ഉടൻ ചുമതലയേൽക്കും. ഇപ്പോഴത്തെ ചീഫ് എം.കെ. ജയിൻ റിസർവ് ബാങ്ക് ഓഫ് ഇന്ത്യ (ആർബിഐ) ഡെപ്യൂട്ടി ഗവർണറായി നിയമിതനായതിനെ തുടർന്നാണ് ശ്രീറാം ഈ സ്ഥാനത്തേയ്ക്ക് എത്തുന്നത്.
എക്കണോമിക്സിൽ ബിരുദവും ചരിത്രത്തിൽ ബിരുദാനന്തര ബിരുദവുമെടുത്ത ബസു 35 വർഷം മുമ്പ് ഒരു പ്രൊബേഷണറി ഓഫീസറായാണ് ജോലിയിൽ പ്രവേശിച്ചത്.
malayalam.goodreturns.in