ഇന്ത്യയിലെ ഓഹരി സൂചികകളായ സെൻസെക്സും നിഫ്റ്റിയും എക്കാലത്തെയും ഉയ‍ർന്ന നേട്ടത്തിൽ വ്യാപാരം ആരംഭിച്ചു. എച്ച്ഡിഎഫ്സി ബാങ്ക്, ലാർസൻ ആൻറ് ട്യൂബ്രോ എന്നീ ഓഹരികളുടെ മികച്ച കുതിപ്പോടെയാണ് സെൻസെക്സ് ഇതുവരെ ഉയരാത്ത 37000 പോയിന്റ് നേട്ടത്തിൽ എത്തിയത്.

നിഫ്റ്റിയും ആദ്യമായാണ് 11,172 പോയിന്റ് എന്ന റെക്കോർഡ് നേട്ടം കൈവരിച്ചത്. ലാർസൻ ആൻഡ് ട്യൂബ്രോ ഓഹരികളാണ് ഇന്ന് ഏറ്റവും കൂടുതൽ നേട്ടമുണ്ടാക്കി കുതിക്കുന്നത്.

മേഖലാ സൂചികകളിൽ പൊതുമേഖലാ ബാങ്കിം​ഗ് മേഖല, എഫ്.എം.സി.ജി, ഇൻഫ്രാസ്ട്രക്ചർ, ഓട്ടോ എന്നീ മേഖലകളിലെ ഓഹരികളും ഇന്ന് ശക്തമായ മുന്നേറ്റം നടത്തുന്നുണ്ട്. എന്നാൽ ഫാർമസ്യൂട്ടിക്കൽ ഓഹരികൾ ഇന്ന് കാര്യമായ നേട്ടമുണ്ടാക്കുന്നില്ല.

നിഫ്റ്റി മിഡ് ക്യാപ് സൂചിക 0.10 ശതമാനം നേട്ടം കൈവരിച്ചു. രൂപയുടെ മൂല്യം 11 പൈസ ഉയർന്ന് 68.76 എന്ന നിലയിലാണ് ഇന്നലെ വ്യാപാരം അവസാനിപ്പിച്ചത്. വിപണിയിലെ ഈ കുതിച്ചുയരൽ സംബന്ധിച്ച് മിക്ക സാമ്പത്തിക വിദഗ്ധരും നിക്ഷേപകർക്ക് മുന്നറിയിപ്പ് നൽകുന്നുണ്ട്.

malayalam.goodreturns.in