ഇന്ത്യയിൽ നിന്ന് വിദേശത്തേയ്ക്കും തിരിച്ചുമുള്ള യാത്രയ്ക്ക് പ്രവാസി മലയാളികൾക്ക് ഒമാൻ എയർ വിമാനങ്ങളിൽ പ്രത്യേക ഇളവ്. ടിക്കറ്റ് നിരക്കിൽ ഏഴ് ശതമാനം ഇളവാണ് ഒമാൻ എയർ ഏർപ്പെടുത്തിയിരിക്കുന്നത്.
നോൺ റസിഡന്റ് കേരളീയരുടെ പരാതി പരിഹാരത്തിനായി രൂപീകരിച്ച നോർക്ക റൂട്ട്സുമായുള്ള ചില കരാറുകളുടെ ഭാഗമായാണ് ടിക്കറ്റ് നിരക്കുകളിൽ ഇളവ് പ്രഖ്യാപിച്ചിരിക്കുന്നത്.
ഇന്ത്യയിൽ നിന്നും ഇന്ത്യയിലേക്കുമുള്ള ഒമാൻ എയർ വിമാനങ്ങളിൽ യാത്ര ചെയ്യുന്ന നോർക്ക തിരിച്ചറിയൽ കാർഡ് ഉള്ള വിദേശ മലയാളികൾക്ക് മാത്രമാണ് ടിക്കറ്റ് നിരക്കിൽ ഏഴു ശതമാനം ഇളവ് ലഭിക്കുക. കാർഡ് ഉടമയുടെ ഭാര്യയ്ക്കോ ഭർത്താവിനോ കൂടാതെ 18 വയസ് തികയാത്ത മക്കൾക്കും ഈ ആനുകൂല്യം ലഭിക്കുന്നതാണ്.
ഇതിന്റെ ധാരണാപത്രം മുഖ്യമന്ത്രി പിണറായി വിജയന്റെ സാന്നിധ്യത്തിൽ കൈമാറി. നോർക്ക റൂട്ട്സ് എക്സിക്യൂട്ടീവ് വൈസ് ചെയർമാൻ കെ. വരദരാജൻ, ചീഫ് എക്സിക്യൂട്ടീവ് ഓഫീസർ കെ. ഹരികൃഷ്ണൻ നമ്പൂതിരി, ഒമാൻ എയർ ഇന്ത്യൻ സബ് കോണ്ടിനന്റ് റീജണൽ വൈസ് പ്രസിഡന്റ് സുനിൽ വി.എ., സെൻട്രൽ ആൻഡ് സൗത്ത് കേരള മാനേജർ ബാലു എബ്രഹാം വർഗ്ഗീസ് എന്നിവർ പങ്കെടുത്തു.
malayalam.goodreturns.in