ദില്ലി: കേന്ദ്ര മന്ത്രി പിയൂഷ് ഗോയല്‍ പാര്‍ലമെന്റില്‍ അവതരിപ്പിക്കുന്ന ഇടക്കാല ബജറ്റിന്റെ അന്തിമ രേഖയുടെ പ്രിന്റിംഗ് പ്രവൃത്തികള്‍ തുടങ്ങിയത് ഹല്‍വ ആഘോഷത്തോടെ. കഴിഞ്ഞയാഴ്ച നോര്‍ത്ത് ബ്ലോക്കിലായിരുന്നു ഔപചാരിക ചടങ്ങ്. കേന്ദ്ര ധനകാര്യ സഹമന്ത്രിമാരായ ശിവ പ്രതാപ് ശുക്ല, പൊന്‍ രാധാകൃഷ്ണന്‍, മന്ത്രാലയത്തിലെ മുതിര്‍ന്ന ഉദ്യോഗസ്ഥര്‍ തുടങ്ങിയവര്‍ ചടങ്ങിന് സാക്ഷികളായി. ധനകാര്യമന്ത്രി അരുണ്‍ ജെയിറ്റ്‌ലി അമേരിക്കയില്‍ ചികില്‍സയിലായതിനാല്‍ ആഘോഷം നഷ്ടമായി. പിന്നീടാണ് പിയൂഷ് ഗോയലിന് മന്ത്രാലയത്തിന്റെ ചുമതല നല്‍കുന്നത്.
ബജറ്റിനു മുമ്പ് മനസ്സിലാക്കിയിരിക്കേണ്ട ചില സാങ്കേതിക പദങ്ങള്‍
നരേന്ദ്രമോദി സര്‍ക്കാര്‍ തെരഞ്ഞെടുപ്പിനെ അഭിമുഖീകരിക്കാനിരിക്കുന്ന സമയത്ത് ബജറ്റ് വളരെ പ്രാധാന്യത്തോടെയാണ് രാജ്യം ഉറ്റുനോക്കുന്നത്. ബജറ്റ് എന്‍ഡിഎയുടെ തെരഞ്ഞെടുപ്പ് പ്രകടനപത്രികയായിരിക്കുമെന്ന രീതിയിലാണ് ബജറ്റ് അവതരണത്തിന് മുന്നോടിയായി നടക്കുന്ന ചര്‍ച്ചകള്‍. കഴിഞ്ഞ സംസ്ഥാന തെരഞ്ഞെടുപ്പുകളില്‍ വലിയ പരാജയം ഏറ്റുവാങ്ങേണ്ടിവന്ന ബിജെപിയും ഘടക കക്ഷികളും തങ്ങളുടെ നഷ്ടമായ വോട്ടുകള്‍ തിരികെ നേടാനുള്ള തന്ത്രങ്ങള്‍ ബജറ്റില്‍ പയറ്റുമെന്നാണ് വിലയിരുത്തപ്പെടുന്നത്. കര്‍ഷകര്‍, ഗ്രാമങ്ങളിലും നഗരങ്ങളിലുമുള്ള മിഡില്‍ ക്ലാസ്, തൊഴിലന്വേഷകര്‍, ചെറുകിട-ഇടത്തരം സംരംഭകര്‍ തുടങ്ങിയ വിഭാഗങ്ങളെ ലക്ഷ്യംവച്ചുകൊണ്ടുള്ളതാവും പ്രഖ്യാപനങ്ങളേറെയും എന്നാണ് കണക്കുകൂട്ടല്‍.

ഹല്‍വ സെറിമണിയില്‍ ധനകാര്യ സെക്രട്ടറി എ എന്‍ ഝാ, സാമ്പത്തികകാര്യ സെക്രട്ടറി സുഭാഷ് ചന്ദ്ര ഗാര്‍ഗ്, റവന്യൂ സെക്രട്ടറി അജയ് ഭൂഷണ്‍ പാണ്ഡെ തുടങ്ങിവരും സന്നിഹിതരായിരുന്നു.
വലിയ പാത്രത്തില്‍ (കടായി) പാകം ചെയ്ത ഹല്‍വ മന്ത്രാലയത്തിലെ മുഴുവന്‍ ജീവനക്കാര്‍ക്കും വിതരണം ചെയ്തു കൊണ്ടായിരുന്നു ബജറ്റ് അച്ചടി ആഘോഷമാക്കിയത്.