രാജ്യത്തെ പ്രമുഖ ഡിജിറ്റല്‍ പ്ലാറ്റ്‌ഫോമായ ഫോണ്‍പെയുടെ ബ്രാന്റ് അംബാസഡറായി സൂപ്പര്‍സ്റ്റാര്‍ ആമിര്‍ ഖാന്‍ വരുന്നു. വിവോ ഐപിഎല്ലിന്റെ ബ്രോഡ്കാസ്റ്റിംഗ് പങ്കാളി കൂടിയായ ഫോണ്‍പെ ഈ അവസരം പരമാവധി മുതലെടുക്കാനുള്ള ശ്രമത്തിലാണ്. ഐപിഎല്‍ മല്‍സരവേളയില്‍ പരമാവധി പരസ്യങ്ങളിലൂടെ തങ്ങളുടെ ബ്രാന്റ് ജനങ്ങളില്‍ കൂടുതലായെത്തിക്കാനുള്ള ശ്രമത്തിലാണ് ഫോണ്‍പെ അധികൃതര്‍. ഇതിന്റെ മുന്നോടിയായി ദാദു കമിംഗ് സൂണ്‍ പരസ്യങ്ങളുമായി ഫോണ്‍പെ രംഗത്തെത്തിയിട്ടുണ്ട്.

രാജ്യത്തെമ്പാടുമുള് ജനങ്ങളില്‍ ഡിജിറ്റല്‍ പേമെന്റിന്റെ നേട്ടങ്ങളെ കുറിച്ച് ബോധവല്‍ക്കരിക്കാന്‍ ആമിര്‍ഖാന്റെ പ്രശസ്തിയും താരമൂല്യവും സഹായകമാവുമെന്ന പ്രതീക്ഷയിലാണ് അധികൃതര്‍. ലോകത്തെ ഏറ്റവും വലിയ സൂപ്പര്‍ സ്റ്റാറുകളിലൊരാളായ ആമിര്‍ഖാന്റെ രാജ്യത്തെ സാമൂഹ്യമാറ്റത്തില്‍ നിര്‍ണായക പങ്കുവഹിച്ച വ്യക്തിയാണെന്നും അതുകൊണ്ടുതന്നെ ഫോണ്‍പെയുടെ അംബാസഡറാവാന്‍ എന്തുകൊണ്ടും യോജിച്ച വ്യക്തിയാണദ്ദേഹമെന്നും ഫോണ്‍പെ സിഇഒ സമീര്‍ നിഗം പറഞ്ഞു.

വളരെ ചുരുങ്ങിയ കാലത്തിനിടയില്‍ രാജ്യത്തെ ദശലക്ഷക്കണക്കിന് ആളുകള്‍ക്കിടയില്‍ ഡിജിറ്റല്‍ പേമെന്റ് സംവിധാനങ്ങള്‍ വളരെ ലളിതമായി അവതരിപ്പിക്കുന്നതില്‍ വലിയ പങ്കുവഹിച്ച ഫോണ്‍പെ വിശ്വാസ്യതയുടെയും നവീനമായ കണ്ടെത്തലുകളുടെയും പ്രതീകമാണെന്ന് ആമിര്‍ഖാനും അഭിപ്രായപ്പെട്ടു. ഫോണ്‍പെയുടെ സന്ദേശം രാജ്യത്തെ കൂടുതല്‍ ജനങ്ങളില്‍ എത്തിക്കുവാന്‍ കമ്പനിയുമായി സഹകരിക്കാന്‍ സാധിച്ചതില്‍ സന്തോഷമുണ്ടെന്നും അദ്ദേഹം പറഞ്ഞു.