ഏറ്റവും കൂടുതല്‍ ബാങ്ക് ബാലന്‍സ് ബിഎസ്പിക്ക്; 670 കോടി!

ദില്ലി: രാജ്യത്ത് ഏറ്റവും കൂടുതല്‍ ബാങ്ക് നിക്ഷേപമുള്ള രാഷ്ട്രീയ പാര്‍ട്ടി മായാവതിയുടെ ബഹുജന്‍ സമാജ് പാര്‍ട്ടി (ബിഎസ്പി). 670 കോടി രൂപയാണ് 2018 ഡിസംബര്‍ മാസം ബാങ്ക് അക്കൗണ്ടില്‍ ഉണ്ടായിരുന്നതെന്നാണ് പാര്‍ട്ടി തന്നെ അറിയിച്ചിരിക്കുന്നത്. രാഷ്ട്രീയ പാര്‍ട്ടികള്‍ തങ്ങളുടെ ബാങ്ക് അക്കൗണ്ടുകളുടെയും നിക്ഷേപങ്ങളുടെയും വിവരങ്ങള്‍ തെരഞ്ഞെടുപ്പ് കമ്മീഷനെ ഫെബ്രുവരി 25ന് അറിയിച്ചിരുന്നു. കാപിറ്റല്‍ റീജ്യണിലെ എട്ട് പൊതുമേഖലാ ബാങ്ക് അക്കൗണ്ടുകളിലാണ് ബിഎസ്പി 669 കോടി രൂപ നിക്ഷേപിച്ചിരിക്കുന്നത്. പണമായി 95.54 ലക്ഷം രൂപ കൈവശം ഉണ്ടെന്നും കമ്മീഷന് നല്‍കിയ റിപ്പോര്‍ട്ടിലുണ്ട്.

ഉത്തര്‍ പ്രദേശിലെ തന്നെ സമാജ്വാദി പാര്‍ട്ടി (എസ്പി) യാണ് ബാങ്ക് അക്കൗണ്ടുകളുടെ കാര്യത്തില്‍ രണ്ടാം സ്ഥാനത്തുള്ളത്. എസ്പിയുടെ പക്കല്‍ 471 കോടി രൂപയാണ് ഉള്ളത്. കോണ്‍ഗ്രസിന്റെ കൈവശം 196 കോടി രൂപയുണ്ട്. തെലുഗുദേശം പാര്‍ട്ടിക്ക് 107 കോടി രൂപയും ബിജെപിക്ക് 82 കോടി രൂപയുമാണ് ബാങ്കിലുള്ളത്. പട്ടികയില്‍ ഏറ്റവും പുറകില്‍ സിപിഎമ്മും ആംആദ്മി പാര്‍ട്ടിയുമാണ്. ഇരു പാര്‍ട്ടികളുടെയും പക്കല്‍ മൂന്ന് കോടി രൂപ മാത്രമാണ് ഉള്ളതെന്ന് കമ്മീഷന് നല്‍കിയ കണക്കുകള്‍ വ്യക്തമാക്കുന്നു.

നിക്ഷേപകര്‍ ജാഗ്രതൈ; ഇന്ത്യാ പോസ്റ്റ് വന്‍ നഷ്ടത്തിലേക്കെന്ന് റിപ്പോര്‍ട്ട് നിക്ഷേപകര്‍ ജാഗ്രതൈ; ഇന്ത്യാ പോസ്റ്റ് വന്‍ നഷ്ടത്തിലേക്കെന്ന് റിപ്പോര്‍ട്ട്

രാഷ്ട്രീയ പാര്‍ട്ടികള്‍ അടച്ച ആദായ നികുതിയുമായി ബന്ധപ്പെട്ട് അസോസിയേഷന്‍ ഫോര്‍ ഡെമോക്രാറ്റിക് റിഫോംസ് പുറത്തുവിട്ട കണക്കുകളില്‍ പറയുന്നത് 2017 ല്‍ 1034 കോടിയും 2018 ല്‍ 1027 കോടിയും ബിജെപിയുടെ വരുമാനമായി രേഖപ്പെടുത്തിയെന്നാണ്. ഇതേ കാലത്ത് ബിഎസ്പിയുടെ വരുമാനം 174 കോടിയില്‍ നിന്ന് 52 കോടിയിലേക്ക് കുത്തനെ താഴ്ന്നു.