ഓഹരി വിപണിയിൽ ഇന്ന് കനത്ത നഷ്ടം; സെന്‍സെക്സ് 495 പോയിന്‍റ് ഇടിഞ്ഞു

അവധിയ്ക്ക് ശേഷം വ്യാപാരത്തിലേക്ക് കടന്ന ഇന്ത്യ ഓഹരി വിപണി ഇന്ന് നഷ്ടത്തില്‍ ക്ലോസ് ചെയ്തു. മുംബൈ ഓഹരി സൂചികയായ സെന്‍സെക്സ് ഇന്ന് 495 പോയിന്‍റ് ഇടിഞ്ഞ് 38,645.18 ലാണ് വ്യാപാരം അവസാനിപ്പിച്ചത്. ദേശീയ ഓഹരി സൂചികയായ നിഫ്റ്റി 158.30 പോയിന്റ് കുറഞ്ഞ് 11,594.50 എന്ന നിലയിലാണ് വ്യാപാരം അവസാനിപ്പിച്ചത്.

747 ഓഹരികൾ നേട്ടമുണ്ടാക്കിയപ്പോൾ 1751 ഓഹരികൾക്ക് നഷ്ടം നേരിട്ടു. 166 ഓഹരികൾ മാറ്റമില്ലാതെ തുടരുകയും ചെയ്തു.

ഇന്ത്യാ ബുൾസ് ഹൗസിങ്, യെസ് ബാങ്ക്, ബിപിസിഎൽ, ഇൻഡസ്ഇൻഡ് ബാങ്ക്, ഐഒസി എന്നീ ഓഹരികൾക്കാണ് ഇന്ന് നിഫ്റ്റിയിൽ നഷ്ടം നേരിട്ടത്. ഭാരതി എയർടെൽ, വിപ്രോ, ടിസിഎസ്, ടെക് മഹീന്ദ്ര, ഇൻഫോസിസ് എന്നീ ഓഹരികൾ നേട്ടത്തിലായിരുന്നു.

ഐടി ഒഴികെയുള്ള ബാങ്കിം​ഗ്, ഓട്ടോ, മെറ്റൽ, ഫാർമ, ഇൻഫ്രാ, എഫ്.എം.സി.ജി എന്നീ ഓഹരികൾ ഇന്ന് നഷ്ടത്തിലാണ് വ്യാപാരം അവസാനിപ്പിച്ചത്. എന്‍എസ്ഇയില്‍ ജെറ്റ് എയര്‍വേസ് ഓഹരികള്‍ 23.17 ശതമാനം നഷ്ടം രേഖപ്പെടുത്തി.

 malayalam.goodreturns.in