ദില്ലി: ചരക്കുസേവന നികുതി (ജിഎസ്ടി) തട്ടിപ്പുകള് കണ്ടെത്തുന്നതിന്റെ ഭാഗമായി ആദായ നികുതി വിവരങ്ങള് ജിഎസ്ടിക്ക് കാമാറാന് സംവിധാനമൊരുങ്ങുന്നു. പ്രത്യക്ഷ-പരോക്ഷ നികുതി വകുപ്പും സെന്ട്രല് ബോര്ഡ് ഓഫ് ഡയരക്ട് ടാക്സസും തമ്മില് ഇതുമായി ബന്ധപ്പെട്ട് ധാരണയിലെത്തി. ഇതിന്റെ ഭാഗമായി ആദായ നികുതി വിവരങ്ങള് ഗുഡ്സ് ആന്റ് സര്വീസസ് നെറ്റ്വര്ക്കിന് (ജിഎസ്ടിഎന്) കൈമാറുന്ന കാര്യത്തില് മേല്നോട്ടം വഹിക്കുന്നതിനായി ഒരു നോഡല് ഓഫീസറെ നിയമിച്ചിട്ടുണ്ട്.
നികുതി വെട്ടിപ്പ് തടയുന്നതിന്റെ ഭാഗമായി 2019-20 വര്ഷത്തെ ഇന്കം ടാക്സ് റിട്ടേണ് ഫോമില് പുതിയ മാറ്റങ്ങള് വരുത്തി ഐടി വകുപ്പ് ഉത്തരവ് പുറപ്പെടുവിച്ചിരുന്നു. നികുതി ദായകന്റെ ബിസിനസുമായി ബന്ധപ്പെട്ട വിവരങ്ങള് ഉള്പ്പെടുത്തുന്ന വിധത്തിലാണ് മാറ്റം. മൊത്തം വരുമാനം, വിറ്റുവരവ് തുടങ്ങിയ ജിഎസ്ടിയുമായി ബന്ധപ്പെട്ട വിവരങ്ങളാണ് ഇന്കം ടാക്സ് റിട്ടേണില് ഉള്പ്പെടുത്തേണ്ടത്. പുതിയ സംവിധാനം നിലവില് വന്നതിന്റെ പശ്ചാത്തലത്തില് ജിഎസ്ടി വിഭാഗത്തിന്റെ ഐടി വിംഗായ ജിഎസ്ടി നെറ്റ്വര്ക്കിന് ആദായ നികുതി വകുപ്പിനെ നോഡല് ഓഫീസര് വഴി സമീപിക്കാനും ആവശ്യമായ ആദായ നികുതി വിവരങ്ങള് ശേഖരിക്കുവാനും സാധിക്കും.
പോഷക സമൃദ്ധിയോടെ മില്മയുടെ ഫോര്ട്ടിഫൈഡ് പാല് വിപണിയില്
ഒരു വ്യാപാരി നല്കുന്ന ജിഎസ്ടിയും അദ്ദേഹത്തിന്റെ ആദായ നികുതി വിവരങ്ങളും തമ്മില് പൊരുത്തപ്പെടുന്നുണ്ടോ എന്ന് പരിശോധിക്കുകയാണ് ഇതിലൂടെ ലക്ഷ്യമിടുന്നത്. ജിഎസ്ടി അടയ്ക്കുകയും അതേസമയം ഇന്കം ടാക്സ് നല്കാതിരിക്കുകയും ചെയ്യുന്നവരെ കണ്ടെത്താനും പുതിയ സംവിധാനം വഴി സാധിക്കും. നിബന്ധനകള്ക്ക് വിധേയമായിട്ടായിരിക്കും ആദായ നികുതി വിവരങ്ങള് ജിഎസ്ടിക്ക് കൈമാറുക. വിവരങ്ങളുടെ സുരക്ഷ ഉറപ്പ് വരുത്തുന്നതുള്പ്പെടെയുള്ള കാര്യങ്ങള് ഇതില് വരും.