മുംബൈ: രാജ്യത്തെ ഏറ്റവും വലിയ ബാങ്കായ എസ്ബിഐ ഒരു ലക്ഷം രൂപയോ അതിനു മുകളിലോ ഉള്ള സേവിംഗ്‌സ് ഡെപ്പോസിറ്റുകളുടെ പലിശ നിരക്ക് കുറച്ചു. മെയ് ഒന്നുമുതലാണ് മാറ്റം പ്രാബല്യത്തില്‍ വന്നത്. 2019 മാര്‍ച്ചില്‍ കൈക്കൊണ്ട തീരുമാന പ്രകാരം ആര്‍ബിഐയുടെ റിപ്പോ നിരക്കുമായി എസ്ബിഐ പലിശ നിരക്കുകള്‍ ബന്ധിപ്പിച്ചതോടെയാണിത്.

അതുപ്രകാരം സേവിംഗ്‌സ് അക്കൗണ്ടുകളിലെ ഒരു ലക്ഷം രൂപയ്‌ക്കോ അതിനു മുകളിലോ ഉള്ള നിക്ഷേപങ്ങള്‍ക്ക് 3.25 ശതമാനമായിരിക്കും പലിശ നല്‍കുക. എന്നാല്‍ ഒരു ലക്ഷത്തില്‍ താഴെയുള്ള നിക്ഷേപങ്ങള്‍ക്ക് നിലവിലെ 3.5 ശതമാനം പലിശ തന്നെ തുടരും. നേരത്തേ ഒരു ലക്ഷത്തിനു മുകളിലുള്ള സേവിംഗ്‌സ് അക്കൗണ്ടിന് നാല് ശതമാനമായിരുന്നു പലിശ.

ആര്‍ബിഐയുടെ റിപ്പോ നിരക്കിനേക്കാള്‍ 2.75 ശതമാനം കുറവായിരിക്കും തങ്ങളുടെ സേവിംഗ്‌സ് അക്കൗണ്ടുകള്‍ക്കുള്ള പലിശ നിരക്ക്. നിലവില്‍ 6 ശതമാനമാണ് ആര്‍ബിഐ റിപ്പോ റേറ്റ്. ഇനി മുതല്‍ ആര്‍ബിഐയുടെ റിപ്പോ റേറ്റിന് അനുസൃതമായി സേവിംഗ് അക്കൗണ്ട് നിക്ഷേപത്തിനുള്ള പലിശ നിരക്ക് കൂടുകയോ കുറയുകയോ ചെയ്യുമെന്നും എസ്ബിഐ വ്യക്തമാക്കി. ആര്‍ബിഐ മോണിറ്ററി പോളിസിയില്‍ വരുത്തുന്ന ഏതൊരു മാറ്റവും ഉടന്‍ തന്നെ ഉപഭോക്താവിലേക്കെത്തിക്കുകയെന്ന ലക്ഷ്യത്തോടെയാണ് എസ്ബിഐ പുതിയ മാറ്റം കൊണ്ടുവന്നിരിക്കുന്നത്.