എസ്സാര്‍ ഗ്രൂപ്പ് കമ്പനിക്ക് 36.5 കോടി രൂപ വായ്പ; ചന്ദ കോച്ചാര്‍ ആര്‍ബിഐയെ കബളിപ്പിച്ചു

ദില്ലി: ഐസിഐസിഐ ബാങ്ക് മുന്‍ സിഇഒ ചന്ദ കോച്ചാര്‍ എസ്സാര്‍ സ്റ്റീല്‍ മിനെസോട്ട ഗ്രൂപ്പ് കമ്പനിക്ക് 36.5 കോടി രൂപയുടെ വായ്പ തരപ്പെടുത്തി നല്‍കിയത് റിസര്‍വ് ബാങ്ക് ഓഫ് ഇന്ത്യയെ കബളിപ്പിച്ചാണെന്ന് റിപ്പോര്‍ട്ട്.

മൗറീഷ്യസ് കേന്ദ്രമായി പ്രവര്‍ത്തിക്കുന്ന കമ്പനിക്ക് വായ്പ ലഭ്യമാക്കുന്നതില്‍ നിരവധി ക്രമക്കേടുകളുണ്ടെന്ന് ഉണ്ടെന്ന് ആര്‍ബിഐ ചൂണ്ടിക്കാട്ടിയിരുന്നുവെങ്കില്‍ അതെല്ലാം അവഗണിച്ചാണ് കോച്ചാല്‍ വായ്പ നല്‍കിയത്.

2014 സപ്തംബറില്‍ ഐസിഐസിഐ ബാങ്ക് ആര്‍ബിഐയെ അറിയിച്ചത് കമ്പനിക്ക് അധിക ഫണ്ട് ലഭ്യമാക്കിയിട്ടില്ലെന്നായിരുന്നു. എന്നാല്‍ 36.5 കോടി രൂപ വായ്പ നല്‍കിയതായി പിന്നീട് വ്യക്തമാവുകയായിരുന്നു.മൗറീഷ്യസ് കമ്പനിക്ക് വായ്പ അനുവദിക്കുന്ന കമ്മിറ്റിയില്‍ അംഗമായിരുന്നു കോച്ചാര്‍. ആര്‍ബിഐ മുന്നോട്ടുവച്ച എതിര്‍പ്പുകള്‍ മറച്ചുവെച്ചാണ് ലോണിന് കമ്മിറ്റി അനുവാദം നല്‍കിയത്.

അതിനിടെ, വീഡിയോകോണ്‍ വായ്പാ തട്ടിപ്പ് കേസില്‍ ഹാജരാവാന്‍ കൂടുതല്‍ സമയം വേണമെന്ന് എന്‍ഫോഴ്‌സ്‌മെന്റ് ഡയരക്ടറേറ്റ് മുമ്പാകെ അപേക്ഷ നല്‍കിയിരിക്കുകയാണ് ചന്ദ കോച്ചാറും ഭര്‍ത്താവ് ദീപക് കോച്ചാറും. ഇരുവരും ഏപ്രില്‍ 30ന് ഇഡി മുമ്പാകെ ഹാജരാവണമെന്ന് നേരത്തേ നോട്ടീസ് നല്‍കിയിരുന്നു. ഹാജരാവാനുള്ള അവസാന സമയം മെയ് 11 ആയിരിക്കുമെന്ന് ഇഡി അറിയിച്ചിട്ടുണ്ട്. കേസുമായി ബന്ധപ്പെട്ട് ദീപക് കോച്ചാറിന്റെ സഹോദരന്‍ രാജീവ് കോച്ചാറിനെ എന്‍ഫോഴ്‌സ്‌മെന്റ് ഡയരക്ടറേറ്റ് മൂന്നു ദിവസം തുടര്‍ച്ചയായി ചോദ്യം ചെയ്തിരുന്നു.