ലോക്‌സഭ തിരഞ്ഞെടുപ്പ് ഫലം നാളെ വരാനിരിക്കെ ഓഹരി വിപണി ഇന്ന് നേട്ടത്തിൽ ക്ലോസ് ചെയ്തു. ഞായറാഴ്ച്ച വൈകുന്നേരം എക്‌സിറ്റ് പോള്‍ ഫലങ്ങള്‍ പുറത്തു വിട്ടതിനെ തുടർന്ന് തിങ്കളാഴ്ച്ച മുതൽ ഓഹരി വിപണി തുടർച്ചയായ മൂന്നും ദിവസങ്ങളിലും മികച്ച നേട്ടത്തിലാണ് ക്ലോസ് ചെയ്തത്. എന്‍ഡിഎയ്ക്ക് അനുകൂലമായ എക്സിറ്റ് പോൾ ഫലങ്ങൾ പുറത്തു വന്നതോടെയാണ് ഓഹരി വിപണിയിൽ നേട്ടമുണ്ടായത്.

സെന്‍സെക്‌സ് 140.41 പോയന്റ് ഉയര്‍ന്ന് 39110.21ലും നിഫ്റ്റി 28.80 പോയന്റ് ഉയര്‍ന്ന് 11737.90ലുമാണ് ക്ലോസ് ചെയ്തത്. ബിഎസ്ഇയിലെ 1356 കമ്പനികളുടെ ഓഹരികള്‍ നേട്ടത്തിലും 1147 ഓഹരികള്‍ നഷ്ടത്തിലുമായിരുന്നു. ബാങ്ക്, വാഹനം, ഇന്‍ഫ്ര, ഫാര്‍മ, ലോഹം തുടങ്ങിയ വിഭാഗങ്ങളിലെ ഓഹരികളായിരുന്നു ഇന്ന് നേട്ടത്തില്‍. ഐടി, എഫ്എംസിജി ഓഹരികള്‍ നഷ്ടത്തിലായിരുന്നു. ഐടി ഓഹരികൾ തിങ്കളാഴ്ച്ച മുതൽ മോശം പ്രകടനമാണ് കാഴ്ച്ച വച്ചിരുന്നത്.

ഇന്‍ഡസിന്‍ഡ് ബാങ്ക്, സണ്‍ ഫാര്‍മ, ബജാജ് ഓട്ടോ, ബിപിസിഎല്‍, ഐഷര്‍ മോട്ടോഴ്‌സ് തുടങ്ങിയ ഓഹരികള്‍ നേട്ടത്തിലായിരുന്നു ഇന്ന് നേട്ടത്തിലായിരുന്നു. ടെക് മഹീന്ദ്ര, ഇന്ത്യബുള്‍സ് ഹൗസിങ്, ഭാരതി ഇന്‍ഫ്രടെല്‍, ഐടിസി, യെസ് ബാങ്ക് തുടങ്ങിയ ഓഹരികള്‍ ഇന്ന് നഷ്ടത്തിലുമാണ് വ്യാപാരം അവസാനിപ്പിച്ചത്.

നാളെ രാവിലെ 8 മണിക്ക് വോട്ടെണ്ണൽ ആരംഭിക്കും. ഉച്ചയ്ക്ക് ശേഷമായിരിക്കും ഓഹരി വിപണിയിൽ മാറ്റങ്ങൾ പ്രകടമാകുക. എക്സിറ്റ് പോൾ ഫലങ്ങൾക്ക് അനുസരിച്ചാണ് യഥാർത്ഥ ഫലങ്ങൾ എങ്കിൽ തീർച്ചയായും ഓഹരി വിപണിക്ക് അനുകൂലമായി ബാധിക്കുമെന്ന് അനലിസ്റ്റുകളുടെ അഭിപ്രായം. എക്സിറ്റ് പോൾ ഫലങ്ങൾക്ക് വിപരീതമാണ് തെരഞ്ഞെടുപ്പ് ഫലമെങ്കിൽ ഓഹരി സൂചികകൾ കുറഞ്ഞത് 10 പോയിന്റ് എങ്കിലും കൂടാനും കുറയാനും സാധ്യതയുണ്ടെന്നും അഭിപ്രായങ്ങളുണ്ട്.

 malayalam.goodreturns.in