നരേന്ദ്ര മോദി മന്ത്രിസഭ സത്യപ്രതിജ്ഞ ചെയ്ത് അധികാരത്തിലേറ്റതോടെ നേട്ടത്തിൽ വ്യാപാരം ആരംഭിച്ച ഓഹരി വിപണി നഷ്ട്ടത്തിൽ ക്ലോസ് ചെയ്തു. ഉച്ചയ്ക്ക് മുമ്പ് സെന്‍സെക്‌സ് 40,000ന് മുകളില്‍ പോയിരുന്നെങ്കിലും 117.77 പോയന്റ് നഷ്ടത്തില്‍ 39,714.20ലാണ് ഇന്ന് ക്ലോസ് ചെയ്തത്. നിഫ്റ്റി 23.10 പോയന്റ് നഷ്ടത്തില്‍ 11,922.80ലുമാണ് വ്യാപാരം അവസാനിപ്പിച്ചത്.

ബിഎസ്ഇയിലെ 1020 കമ്പനികളുടെ ഓഹരികള്‍ ഇന്ന് നേട്ടത്തിലും 1534 ഓഹരികള്‍ നഷ്ടത്തിലുമായിരുന്നു. 155 ഓഹരികൾ മാറ്റമില്ലാതെ തുടർന്നു. യെസ് ബാങ്ക്, ഐടിസി, ഗ്രാസിം ഇൻഡസ്ട്രീസ്, വേദാന്ത, സീ വിനോദം എന്നിവയ്ക്കാണ് നിഫ്റ്റിയിൽ നഷ്ടം നേരിട്ടത്. ടെക് മഹീന്ദ്ര, ഏഷ്യൻ പെയിന്റ്സ്, ടിസിഎസ്, ഐ.ഒ.സി, ബ്രിട്ടാനിയ ഇൻഡസ്ട്രീസ് എന്നീ ഓഹരികൾ നേട്ടത്തിലാണ് ക്ലോസ് ചെയ്തത്.

പിഎസ്യു ബാങ്ക്, മെറ്റൽ, ഓട്ടോ, ഇൻഫ്രാ, ഫാർമ തുടങ്ങിയ ഓഹരികൾക്കാണ് ഇന്ന് വിൽപ്പന സമ്മർദം നേരിട്ടത്. ഊർജം, ഐടി മേഖലകൾക്ക് ഇന്ന് മികച്ച ദിവസമായിരുന്നു. ഇന്നലെ നരേന്ദ്ര മോദി സര്‍ക്കാരിന്റെ സത്യപ്രതിജ്ഞ നടക്കാനിരിക്കെ ഉച്ചയ്ക്ക് ശേഷം ഓഹരി സൂചികകൾ കുതിച്ച് ഉയർന്നിരുന്നു. സെന്‍സെക്‌സ് 329.92 പോയന്റ് ഉയര്‍ന്ന് 39,831.97ലും നിഫ്റ്റി 84.80 പോയന്റ് നേട്ടത്തില്‍ 11,945.90ലുമാണ് ഇന്നലെ വ്യാപാരം അവസാനിപ്പിച്ചത്.

എന്നാൽ ഇന്ന് ഉച്ചയ്ക്ക് ശേഷം വിപണി താഴേയ്ക്ക് പോകുകയായിരുന്നു. ഇന്നലെ ഓട്ടോ, ഫാർമ, മെറ്റൽ എന്നീ മേഖലകൾക്കായിരുന്നു നഷ്ടം നേരിട്ടിരുന്നത്. ഇൻഫ്രാ, ഐടി, പിഎസ്യു ബാങ്ക്, ഊർജം എന്നീ മേഖലകളിലെ ഓഹരികൾ നേട്ടമുണ്ടാക്കുകയും ചെയ്തിരുന്നു. ക്രൂഡ് ഓയിൽ വിലയിൽ ഇന്ന് കുറവ് രേഖപ്പെടുത്തിയിട്ടുണ്ട്. ഒരു മാസത്തിനിടയിലെ ഏറ്റവും കുറഞ്ഞ നിരക്കാണ് ഇന്നത്തേത്.

malayalam.goodreturns.in