രാജ്യത്തെ ഏറ്റവും വലിയ നികുതി പരിഷ്‌ക്കാരമായ ചരക്ക് സേവന നികുതി (ജി.എസ്.ടി.) നിലവില്‍ വന്നതിന്റെ രണ്ടാംവാര്‍ഷികമായ ജൂലായ് ഒന്ന് വിപുലമായ പരിപാടികളോടെ ആഘോഷിക്കാന്‍ കേന്ദ്രസര്‍ക്കാര്‍ തീരുമാനം. ഇതോടനുബന്ധിച്ച് ഡല്‍ഹിയിലെ അംബേദ്കര്‍ ഭവനില്‍ നടക്കുന്ന ചടങ്ങിനെ കേന്ദ്രധനമന്ത്രി നിര്‍മ്മല സീതാരാമന്‍, സഹമന്ത്രി അനുരാഗ് താക്കൂര്‍ എന്നിവര്‍ അഭിസംബോധന ചെയ്യും. കേന്ദ്ര സംസ്ഥാന നികുതി വകുപ്പുകളിലെ വിവിധ ഉദ്യോഗസ്ഥരും ആഘോഷപരിപാടികളില്‍ പങ്കെടുക്കും.

രണ്ട് വര്‍ഷത്തെ ജി.എസ്.ടി., പരോക്ഷ നികുതി വ്യവസ്ഥ എന്നിവയുമായി ബന്ധപ്പെട്ട് പ്രത്യേക അവതരണം പരിപാടിയോടനുബന്ധിച്ച് ഉണ്ടായിരിക്കും. നിലവിലുളള ജി.എസ്.ടി.ആര്‍-3ബി, ജി.എസ്.ടി.ആര്‍-1 എന്നിവയ്ക്ക് പകരം വരുന്ന പുതിയ റിട്ടേണ്‍ ഫയലിങ് ചടങ്ങില്‍ പ്രകാശനം ചെയ്യും.

2017 ജൂണ്‍ 30ന് അര്‍ധരാത്രി പാര്‍ലമെന്റിന്റെ പ്രത്യേക സമ്മേളനം വിളിച്ചാണ് ജി.എസ്.ടി. പ്രഖ്യാപിച്ചത്. 17 ഇനം പരോക്ഷനികുതികള്‍ ഇല്ലാതാക്കി ഒറ്റ നികുതി സമ്പ്രദായം കൊണ്ടുവന്ന 'ഒരു രാജ്യം ഒരൊറ്റ നികുതി' എന്ന ആശയമാണ് ജി.എസ്.ടിക്ക് പിന്നില്‍. രാജ്യത്തുടനീളം ചരക്ക് നീക്കം സുഗമമാക്കിയ ഇ വേ ബില്‍ നികുതി സമ്പ്രദായരംഗത്തെ ചരിത്രപരമായ മാറ്റമായിരുന്നു.