ദില്ലി: ആര്‍ടിജിഎസ്, നെഫ്റ്റ് സമ്പ്രദായങ്ങളിലൂടെയുള്ള ഫണ്ട് ട്രാന്‍സ്ഫറുകള്‍ക്ക് ഇന്നു മുതല്‍ സര്‍വീസ് ചാര്‍ജ് കുറയും. ആര്‍ടിജിഎസ്, നെഫ്റ്റ് ബാങ്കുകളുടെ പക്കല്‍ നിന്ന് ഈടാക്കിയിരുന്ന സര്‍വീസ് ചാര്‍ജ് ഒഴിവാക്കിയ റിസര്‍വ് ബാങ്കിന്റെ നടപടി പ്രാബല്യത്തില്‍ വന്നതോടെയാണിത്. ഇനി ബാങ്കുകള്‍ ഓണ്‍ലൈന്‍ പേയ്മെന്റുകള്‍ക്ക് ഈടാക്കുന്ന തുക മാത്രമേ ഉപഭോക്താക്കള്‍ നല്‍കേണ്ടിവരികയുള്ളൂ. ബാങ്കുകള്‍ ഈ ചര്‍ജ് ഒഴിവാക്കി നല്‍കണമെന്ന് ആര്‍ബിഐ അഭിപ്രായപ്പെട്ടിരുന്നു.

രണ്ടു ലക്ഷം രൂപ വരെയുള്ള ഫണ്ട് ട്രാന്‍സ്ഫറുകള്‍ക്കാണ് നാഷനല്‍ ഇലക്ട്രോണിക് ഫണ്ട്‌സ് ട്രാന്‍സ്ഫര്‍ അഥവാ നെഫ്റ്റ് സംവിധാനം ഉപയോഗിക്കുന്നത്. വലിയ തുകകള്‍ തല്‍സമയം ചെയ്യുന്നതിനായുള്ള രീതിയാണ് റിയല്‍ ടൈം ഗ്രോസ് സെറ്റില്‍മെന്റ് അഥവാ ആര്‍ടിജിഎസ്. നിലവില്‍ എസ്ബിഐ ഒരു രൂപ മുതല്‍ അഞ്ചു രൂപ വരെ നെഫ്റ്റ് ഇടപാടുകള്‍ക്ക് ഈടാക്കുന്നുണ്ട്. അഞ്ചു രൂപ മുതല്‍ 50 വരെയാണ് ആര്‍ടിജിഎസ് ഇടപാടുകള്‍ക്ക് ചാര്‍ജ്.

ഡിജിറ്റല്‍ ഇടപാടുകള്‍ പ്രോത്സാഹിപ്പിക്കുന്നതിന്റെ ഭാഗമായാണ് സര്‍വീസ് ചാര്‍ജ് ഒഴിവാക്കാനുള്ള ആര്‍ബിഐയുടെ നടപടിയെന്ന് ഇന്ത്യന്‍ ബാങ്ക്‌സ് അസോസിയേഷന്‍ ചെയര്‍മാന്‍ സുനില്‍ മേത്ത പറഞ്ഞു.  അതേസമയം, ആര്‍ബിഐ സര്‍വീസ് ചാര്‍ജ് എടുത്തുകളഞ്ഞെങ്കിലും ബാങ്കുകള്‍ അത് ഒഴിവാക്കിയിട്ടില്ല. ബാങ്കുകള്‍ വിവിധ പണമിടപാടുകള്‍ക്ക് ഈടാക്കുന്ന ചാര്‍ജുകള്‍ പുനപരിശോധിക്കാന്‍ ആര്‍ബിഐ ഒരു കമ്മിറ്റി രൂപീകരിച്ചിട്ടുണ്ട്. ഇന്ത്യന്‍ ബാങ്ക് അസോസിയേഷന്‍ സിഇഒ വി ജി കണ്ണന്‍ ആയിരിക്കും കമ്മിറ്റിയുടെ തലവന്‍. എടിഎം ഇടപാടുകള്‍ വര്‍ധിച്ച സാഹചര്യത്തില്‍ അവയ്ക്ക് ഈടാക്കുന്ന ചാര്‍ജുകള്‍ എടുത്തുകളയണമെന്ന ആവശ്യവും ശക്തമാണ്.