എയര്‍പോര്‍ട്ട് അതോറിറ്റി ഓഫ് ഇന്ത്യയുടെ മൂന്ന് എയര്‍പോര്‍ട്ടുകള്‍ അദാനി എന്റര്‍പ്രൈസസിന് നടത്തിപ്പിന് നല്‍കാന്‍ കേന്ദ്രസര്‍ക്കാരിന്റെ അനുമതി. കേന്ദ്ര വ്യോമയാനമന്ത്രാലയത്തിന്റെ ശുപാര്‍ശയെത്തുടര്‍ന്നാണ് ഈ തീരുമാനം. അഹമ്മദാബാദ്, ലക്‌നൗ, മംഗലാപുരം വിമാനത്താവളങ്ങളാണ് 50 വര്‍ഷത്തേക്ക് നടത്തിപ്പിനായി വിട്ടുനല്‍കുക. ഇവയെക്കൂടാതെ ഗുവാഹട്ടി, തിരുവനന്തപുരം, ജയ്പൂര്‍ വിമാനത്താവളങ്ങള്‍ നടത്തിപ്പിനെടുക്കാനുളള കരാര്‍ നേരത്തെ അദാനി ഗ്രൂപ്പ് ലേലത്തില്‍ നേടിയിരുന്നു.

എന്നാല്‍ ഈ വിമാനത്താവളങ്ങള്‍ നല്‍കുന്നതു സംബന്ധിച്ച അനിശ്ചിതത്വം തുടരുകയാണ്. തിരുവനന്തപുരം വിമാനത്താവളം അദാനി ഗ്രൂപ്പിന് നടത്തിപ്പിന് നല്‍കുന്നതിനെതിരെ കടുത്ത എതിര്‍പ്പുമായി സംസ്ഥാന സര്‍ക്കാര്‍ കേന്ദ്രത്തെ സമീപിച്ചിരുന്നു. തിരുവനന്തപുരം വിമാനത്താവളത്തിന്റെ നടത്തിപ്പ് കേരളത്തിന് നല്‍കണമെന്നാവശ്യപ്പെട്ട് മുഖ്യമന്ത്രി പിണറായി വിജയന്‍ കേന്ദ്രത്തിന് കത്തയച്ചിരുന്നു.

2018 നവംബറിലാണ് അഹമ്മദാബാദ്, ലക്‌നൗ, മംഗലാപുരം,ഗുവാഹട്ടി, തിരുവനന്തപുരം, ജയ്പൂര്‍ തുടങ്ങിയ വിമാനത്താവളങ്ങളുടെ നടത്തിപ്പ് സ്വകാര്യവത്ക്കരിക്കാന്‍ കേന്ദ്രസര്‍ക്കാര്‍ തീരുമാനിച്ചത്. വിമാനത്താവളെ അന്താരാഷ്ട്ര നിലവാരത്തിലേക്ക് ഉയര്‍ത്താനും ഇതുവഴി എയര്‍പോര്‍ട്ട് അതോറിറ്റിയ്ക്ക് വരുമാനം കൂട്ടാനുമാണ് ഇതിലൂടെ ലക്ഷ്യമിടുന്നത്.