Click it and Unblock the Notifications
ഉല്പ്പന്നങ്ങളില് വ്യാപക കൃത്രിമം; ആമസോണിനും ഫ്ളിപ്കാര്ട്ടിനും സ്നാപ്ഡീലിനുമെതിരേ ഡല്ഹി ഹൈക്കോടതി
ദില്ലി: രാജ്യത്തെ പ്രധാന ഇ-കൊമേഴ്സ് സ്ഥാപനങ്ങളായ ആമസോണ്, ഫ്ളിപ്കാര്ട്ട്, സ്നാപ്ഡീല് എന്നിവയ്ക്കെതിരേ ഡല്ഹി ഹൈക്കോടതിയുടെ നടപടി. ഓണ്ലൈനിലൂടെ വില്ക്കുന്ന ഉല്പ്പന്നങ്ങളില് വ്യാപകമായ കൃത്രിമം കാണിക്കുന്നുവെന്ന പരാതിയിലാണ് കോടതിയുടെ ഇടപെടല്.
പ്രധാന ഡയരക്ട് മാര്ക്കറ്റിംഗ് സ്ഥാപനങ്ങളായ ആംവേ, ഒറിഫ്ളെയിം, മോഡികെയര് തുടങ്ങിയവയുടെ ഉല്പ്പന്നങ്ങള് അവരുടെ അനുവാദമില്ലാതെ വില്ക്കരുതെന്നാണ് കോടതി ഓണ്ലൈന് വ്യാപാര സ്ഥാപനങ്ങള്ക്ക് നല്കിയിരിക്കുന്ന കര്ശന നിര്ദ്ദേശം.
തങ്ങളുടെ ഉല്പ്പന്നങ്ങളില് വ്യാപകമായ കൃത്രിമം കാണിച്ച് ഓണ്ലൈനിലൂടെ വില്പ്പന നടത്തുന്നതായി കമ്പനികള് പരാതി നല്കിയതിനെ തുടര്ന്നാണ് കോടതിയുടെ ഇടപെടല്. പരാതിയെ തുടര്ന്ന് ഇ-കൊമേഴ്സ് സ്ഥാപനങ്ങളുടെ വെയര്ഹൗസുകളില് നടത്തിയ പരിശോധനയിലാണ് വന് തട്ടിപ്പുകള് നടക്കുന്നതായി കണ്ടെത്തിയത്. കാലാവധി കഴിഞ്ഞ ഉല്പ്പന്നങ്ങളുടെ എക്സ്പയറി ഡേറ്റ് മാറ്റിയും ഉല്പ്പന്നങ്ങളുടെ വില കൂട്ടിയിട്ടും കമ്പനിയുടെ പേരുകളില് മാറ്റം വരുത്തിയും ഉല്പ്പന്നങ്ങളുടെ കോഡുകളും സീലുകളും മായ്ച്ചുമൊക്കെയാണ് ആമസോണ്, ഫ്ളിപ്കാര്ട്ട്, സ്നാപ്ഡീല് എന്നീ കമ്പനികള് ഇവ ഓണ്ലൈനില് വില്പ്പന നടത്തുന്നതെന്നായിരുന്നു കണ്ടെത്തല്. ഇങ്ങനെ കൃത്രിമം വരുത്തിയ ഉല്പ്പന്നങ്ങള് കുറഞ്ഞ വിലയ്ക്ക് ഓണ്ലൈനില് വില്ക്കുന്നതു മൂലം തങ്ങള്ക്ക് കോടികളുടെ നഷ്ടമുണ്ടാകുന്നതായും കമ്പനികള് പരാതിയില് ചൂണ്ടിക്കാട്ടിയിരുന്നു.
ഇത്തരം സാഹചര്യത്തില് ഈ കമ്പനികളുടെ അനുവാദമില്ലാതെ അവരുടെ ഉല്പ്പന്നങ്ങള് വില്ക്കുന്നത് വ്യാപാര കരാറിന്റെ ലംഘനമായി പരിഗണിക്കുമെന്ന് താല്ക്കാലിക ഉത്തരവില് ഹൈക്കോടതി വ്യക്തമാക്കി.
കമ്പനികളുടെ പേരിലും ലോഗോയിലും ഉല്പ്പന്നങ്ങളുടെ ഇമേജുകളിലും മാറ്റങ്ങള് വരുത്തി വില്പ്പന നടത്തുന്നത് ഉപഭോക്താക്കളെയും കമ്പനികളെയും ഒരു പോലെ വഞ്ചിക്കുന്ന നടപടിയാണെന്നും കോടതി അഭിപ്രായപ്പെട്ടു.
Sign in with Google