ഉയര്‍ന്ന തുക കൈമാറ്റം നടത്തുമ്പോള്‍ ആധാര്‍ നമ്പര്‍ തെറ്റായി രേഖപ്പെടുത്തുന്നവര്‍ക്ക് ഇനി മുതല്‍ പണി കിട്ടിയേക്കും. ഓരോ തവണ ആധാര്‍ നമ്പര്‍ തെറ്റായി രേഖപ്പെടുത്തുമ്പോഴും 10,000 രൂപ പിഴ ഈടാക്കാനാണ് കേന്ദ്രസര്‍ക്കാര്‍ തീരുമാനം. സെപ്റ്റംബര്‍ ഒന്ന് മുതല്‍ തീരുമാനം നടപ്പിലാക്കും. പിഴ ഈടാക്കുന്നതുമായി ബന്ധപ്പെട്ട നിയമഭേദഗതികള്‍ കേന്ദ്രസര്‍ക്കാര്‍ ഉടന്‍ കൊണ്ടുവരും.

ഉയര്‍ന്ന തുക കൈമാറുമ്പോള്‍ നിലവില്‍ പാന്‍ കാര്‍ഡ് നമ്പര്‍ നിര്‍ബന്ധമാണ്. എന്നാല്‍ പാന്‍കാര്‍ഡ് ഇല്ലാത്തവര്‍ക്ക് ഇതിനു പകരം ആധാര്‍ ഉപയോഗിക്കാമെന്ന് കേന്ദ്രബജറ്റില്‍ പ്രഖ്യാപിച്ചിരുന്നു. ആധാര്‍ കാര്‍ഡും പാന്‍ നമ്പരും തമ്മില്‍ ബന്ധിപ്പിച്ചവര്‍ക്ക് പാന്‍ നമ്പരിന് പകരം ആധാര്‍ നമ്പര്‍ രേഖപ്പെടുത്താമെന്നായിരുന്നു ബജറ്റ് നിര്‍ദേശം. ഇത് യാഥാര്‍ത്ഥ്യമാക്കുന്നതിനായി ഐടി ആക്ടിലെ 272 ബി, 139 എ എന്നീ വകുപ്പുകളില്‍ ഭേദഗതി വരുത്താനാണ് കേന്ദ്രസര്‍ക്കാര്‍ തീരുമാനം.

നിലവില്‍ 120 കോടി പേര്‍ക്ക് ആധാര്‍ നമ്പരുണ്ട്. എന്നാല്‍ 41 കോടി ആളുകള്‍ക്ക് മാത്രമാണ് പാന്‍കാര്‍ഡുളളത്. ഇതില്‍ 22 കോടി ആളുകളുടെ പാന്‍കാര്‍ഡ് ആധാറുമായി ബന്ധിപ്പിച്ചിട്ടുണ്ട്. അതേസമയം ആധാറുമായി ബന്ധിപ്പിക്കാത്ത പാന്‍കാര്‍ഡുകള്‍ ഓഗസ്റ്റ് 31ന് ശേഷം അസാധുവാക്കാനും കേന്ദ്ര ധനമന്ത്രാലയം തീരുമാനിച്ചിട്ടുണ്ട്.എന്നാല്‍ പാന്‍കാര്‍ഡില്ലെങ്കിലും ആദായനികുതി റിട്ടേണ്‍ സമര്‍പ്പിക്കാം.