2018-19 സാമ്പത്തിക വർഷത്തിലെ ആദായനികുതി റിട്ടേൺ സമർപ്പിക്കുന്നതിനുള്ള സമയപരിധി ഇന്ന് അവസാനിക്കും. ഒരു വർഷത്തിൽ നിർദ്ദിഷ്ട വരുമാനം നേടുന്ന വ്യക്തികളാണ് ആദായനികുതി റിട്ടേൺ (ഐടിആർ) ഫയൽ ചെയ്യേണ്ടത്. സമയപരിധിക്കുള്ളിൽ റിട്ടേൺ സമർപ്പിക്കാത്തവർക്ക് പിന്നീടും റിട്ടേൺ സമർപ്പിക്കാൻ അവസരം ലഭിക്കും. എന്നാൽ ഇതിന് കാലതാമസത്തിന് അനുസരിച്ച് പിഴ നൽകേണ്ടി വരും. കാലതാമസം വരുത്തിയ ആദായനികുതി റിട്ടേൺ ആദായനികുതി നിയമത്തിലെ സെക്ഷൻ 234 എഫ് പ്രകാരം വൈകിയുള്ള ഫയലിംഗിന് ഫീസും നൽകേണ്ടി വരും.

ആ​ഗസ്റ്റ് 31ന് ശേഷം ഫയൽ ചെയ്യുന്ന റിട്ടേണിന് 5000 മുതൽ 10000 രൂപ വരെ പിഴയായി നൽകേണ്ടി വരും. കൂടുതൽ താമസിച്ചാൽ പിഴ തുകയും കൂടും. ഡിസംബർ 31നും മാർച്ച് 31നും ഇടയിലുള്ള റിട്ടേൺ ഫയലിം​ഗിന് 10000 രൂപ വരെയാണ് പിഴ നൽകേണ്ടത്. ആദായ നികുതി റിട്ടേൺ സമർപ്പിക്കുന്നതിനുള്ള സമയപരിധി നീട്ടി എന്ന തരത്തിൽ സോഷ്യൽ മീഡിയയിൽ പ്രചരിക്കുന്ന ഉത്തരവ് വ്യാജമാണെന്ന് ആദായനികുതി വകുപ്പ് ഇന്നലെ അറിയിച്ചിരുന്നു.

ട്വിറ്റർ, വാട്‌സ്ആപ്പ് ഗ്രൂപ്പുകൾ ഉൾപ്പെടെ വിവിധ സോഷ്യൽ മീഡിയ പ്ലാറ്റ്‌ഫോമുകളിലൂടെ ആദായ നികുതി റിട്ടേൺ സമർപ്പിക്കുന്ന അവസാന ദിനം സെപ്റ്റംബർ 30 വരെ നീളുമെന്ന വ്യാജ വാർത്തയാണ് പ്രചരിച്ചത്. ആദായനികുതി റിട്ടേൺ സമർപ്പിക്കാൻ മുൻകൂട്ടി നിശ്ചയിച്ചിരുന്ന തീയതി ജൂലൈ 31 ആയിരുന്നു. ഇതാണ് പിന്നീട് ഓഗസ്റ്റ് 31ലേയ്ക്ക് നീട്ടിയത്.

റിട്ടേൺ സമർപ്പിച്ച ശേഷം, വ്യക്തികൾ അവരുടെ വരുമാനം പരിശോധിക്കേണ്ടതുണ്ട്. ഐടിആറിന്റെ സ്ഥിരീകരണത്തിനായി ഐ-ടി വകുപ്പ് അഞ്ച് വഴികൾ വാഗ്ദാനം ചെയ്യുന്നു: നെറ്റ് ബാങ്കിംഗ്, ബാങ്ക് എടിഎം, ആധാർ ഒടിപി, ബാങ്ക് അക്കൗണ്ട്, ഡീമാറ്റ് അക്കൗണ്ട്, ഐ-ടി യുടെ ഇ-ഫയലിംഗ് പോർട്ടൽ എന്നിവ വഴി പരിശോധിക്കാം.

malayalam.goodreturns.in