ഒക്ടോബർ 1 മുതൽ റീട്ടെയിൽ, ചെറുകിട വായ്പകളുടെ പലിശനിരക്ക് ഒരു ബാഹ്യ മാനദണ്ഡവുമായി ബന്ധിപ്പിക്കാൻ റിസർവ് ബാങ്ക് ബാങ്കുകൾക്ക് നിർദ്ദേശം നൽകിയിരുന്നു. ഇതുവഴി വിവിധ വായ്പകളുടെ പലിശ നിരക്ക് 30 ബേസിസ് പോയിന്റ് വരെ കുറയാൻ സാധ്യതയുണ്ട്. ഉദാഹരണത്തിന്, സ്റ്റേറ്റ് ബാങ്ക് ഓഫ് ഇന്ത്യയുടെ നിരക്ക് റിപ്പോ നിരക്കിനേക്കാൾ 2.65 ശതമാനം കൂടുതലാണ്.

30 ലക്ഷം രൂപ വരെയുള്ള ഭവനവായ്പകൾക്ക് ഈടാക്കുന്ന എംസി‌എൽ‌ആർ നിരക്ക് 8.30 ശതമാനമാണ്. ഇത് നാളെ മുതൽ 8.20 ശതമാനമായി കുറയും. എന്നിരുന്നാലും, ഉപഭോക്താവിന്റെ പ്രൊഫൈലിനെ അടിസ്ഥാനമാക്കി ഇതിൽ അധിക നിരക്കുകൾ ഈടാക്കാം. ശമ്പളക്കാരല്ലാത്ത വായ്പക്കാരിൽ നിന്ന് എസ്ബിഐ 15 ബേസിസ് പോയിന്റുകൾ അധികമായി ഈടാക്കും. ഉയർന്ന റിസ്ക് ഗ്രേഡിൽ ഉള്ളവരിൽ നിന്ന് 10 ബേസിസ് പോയിന്റുകൾ കൂടി അധികമായി ഈടാക്കും.

റിസർവ് ബാങ്ക് ഈ വർഷം പലിശ നിരക്കിൽ 75 ബേസിസ് പോയിന്റ് കുറച്ചപ്പോൾ (ഓഗസ്റ്റിൽ 35 ബി‌പി‌എസ് കട്ട് ഒഴികെ) ബാങ്കുകൾ ഈ വർഷം വെറും 29 ബേസിസ് പോയിന്റ് മാത്രമാണ് കുറച്ചത്. ഇത് ആർ‌ബി‌ഐയുടെ പ്രതീക്ഷകൾ നിറവേറ്റുന്നില്ലെന്ന് ഗവർണർ ശക്തികാന്ത ദാസ് നേരത്തെ വ്യക്തമാക്കിയിരുന്നു.

ചില ബാങ്കുകൾ ഇതിനകം തന്നെ വായ്പാ നിരക്കുകളെ റിപ്പോ നിരക്കുമായി ബന്ധിപ്പിച്ചു കഴിഞ്ഞു. സ്റ്റേറ്റ് ബാങ്ക് ഓഫ് ഇന്ത്യ, യൂണിയൻ ബാങ്ക് ഓഫ് ഇന്ത്യ, സെൻട്രൽ ബാങ്ക് ഓഫ് ഇന്ത്യ, പഞ്ചാബ് നാഷണൽ ബാങ്ക്, ഇന്ത്യൻ ബാങ്ക്, സ്വകാര്യ ബാങ്കായ ഫെഡറൽ ബാങ്ക് എന്നിവ അക്കൂട്ടത്തിൽപ്പെടുന്നു.

malayalam.goodreturns.in