എത്ര രൂപയ്ക്ക് ഈ സ്റ്റോക്ക് വാങ്ങാം?; അദാനി പോർട്ട് ഉൾപ്പെടെ 7 ഓഹരികളുടെ ടാർ​ഗറ്റ് വില അറിയാം.....

ഇന്ന് ഏകദേശം 7 കമ്പനികളുടെ ഓഹരികളാണ് ബ്രോക്കറേജ് സ്ഥാപനങ്ങളുടെ റഡാറിൽ ഉള്ളത്. ഡിക്‌സൺ ടെക്, അദാനി പോർട്ട്‌സ്, ആർ.ബി.എൽ ബാങ്ക്, ബജാജ് ഫിനാൻസ്, ഇൻഡസ്ഇൻഡ് ബാങ്ക്, എച്ച്‌.ഡി.എഫ്‌.സി ബാങ്ക്, ടിറ്റാഗർ റെയിൽ തുടങ്ങിയ വലിയ ഓഹരികൾ ഇതിൽ ഉൾപ്പെടുന്നു. ഈ കമ്പനികളുടെ ഓഹരികൾ ഇന്നത്തെ വ്യാപാരത്തിൽ വലിയ ശ്രദ്ധ പിടിച്ചിരിക്കുന്നു. ഈ ഓഹരികൾക്ക് ബ്രോക്കറേജുകൾ നൽകിയ ടാർഗെറ്റ് വില എന്താണെന്ന് പരിശോധിക്കാം. ഒപ്പം ഓരോ കമ്പനികളെ കുറിച്ചും നോക്കാം.

ഡിക്സൺ ടെക്

ഈ ഓഹരി വാങ്ങാൻ നോമുറയുടെ ടാർ​ഗറ്റ് വില ഒരു ഷെയറിന് 18,654 രൂപയാണ്. ബ്രോകറേജിന്റെ കണ്ടെത്തലിൽ ഗൂഗിൾ പിക്സൽ സ്മാർട്ട് ഫോണുകളുടെ വൻതോതിലുള്ള ഉത്പാദനമാണ് കമ്പനി ആരംഭിച്ചതെന്ന് വ്യക്തമായി. ഇനി ​ഗൂ​ഗിളുമായി ഒരു ദീർഘകാല പങ്കാളിത്തത്തിലൂടെ ഡിക്സൺ കമ്പനിയ്ക്ക് വമ്പൻ നേട്ടം ഉറപ്പാക്കാം. ഏകദേശം 1,500 കോടി രൂപയുടെ വരുമാനം വർദ്ധിപ്പിക്കുമെന്നാണ് പ്രതീക്ഷിക്കുന്നത്.

അദാനി പോർട്ട്സ്

ഈ ഓഹരി വാങ്ങാൻ നുവാമയുടെ ടാർ​ഗറ്റ് വില ഒരു ഷെയറിന് 1,960 രൂപയായി നിശ്ചയിച്ചു. ആഭ്യന്തര ബിസിനസിലും അന്തർദേശീയ ബിസിനസുകളുടെ നേതൃത്വത്തിലും വലിയ വളർച്ചയുണ്ടാവുമെന്ന് കമ്പനി വോളിയം ​ഗൈഡൻസിൽ ആവർത്തിച്ചതായി ബ്രോക്കറേജ് അറിയിച്ചു. തുറമുഖ, ലോജിസ്റ്റിക് പ്രവർത്തനങ്ങളിൽ പുതിയ സാങ്കേതികവിദ്യ സ്വീകരിക്കുന്നതും വളർച്ചയെ ത്വരിതപ്പെടുത്തും.

ആർ.ബി.എൽ ബാങ്ക്

ഇൻവെസ്‌ടെക് ഈ ഓഹരി വാങ്ങിക്കുന്നതിനായി ലക്ഷ്യം വെച്ചത് ഒരു ഷെയറിന് 170 രൂപ എന്ന കണക്കിലാണ്. ബാങ്കിന്റെ വലിയ പങ്കാളിയായ ബജാജ് ഫിനാൻസുമായുള്ള കോ-ബ്രാൻഡിംഗ് ക്രെഡിറ്റ് കാർഡ് പങ്കാളിത്തം അവസാനിപ്പിച്ചു. ഇതോടെ ക്രെഡിറ്റ് വളർച്ച 2025 സാമ്പത്തിക വർഷത്തിൽ 2% കുറഞ്ഞ് YOY 13-14% ആയി കുറയുമെന്ന് പ്രതീക്ഷിക്കുന്നു. പുതിയ കോ-ബ്രാൻഡിംഗ് പങ്കാളികളുമായുള്ള ബന്ധം വികസിപ്പിക്കുന്നതിനാൽ 2026 സാമ്പത്തിക വർഷത്തിൻ്റെ രണ്ടാം പകുതിയിൽ കമ്പനിയുടെ ക്രെഡിറ്റ് വളർച്ച മെച്ചപ്പെട്ടേക്കാമെന്ന് കരുതുന്നു.

ബജാജ് ഫിനാൻസ്

വിദേശ ബ്രോക്കറേജ് സ്ഥാപനമായ ജെഫറീസ് ഈ ഓഹരി വാങ്ങുന്നതിനായി ടാർ​ഗറ്റ് വില ഒരു ഷെയറിന് 8,400 രൂപയായി നിർത്തുന്നു. ആർ.ബി.എൽ, ഡി.ബി.എസ് എന്നീ ബാങ്കുമായുള്ള കോ-ബ്രാൻഡഡ് ക്രെഡിറ്റ് കാർഡുകൾ ബജാജ് ഫിനാൻസ് പിൻവലിച്ചെന്ന് ബ്രോക്കറേജ് അറിയിച്ചു.

എച്ച്.ഡി.എഫ്.സി ബാങ്ക്

ഗോൾഡ്മാൻ സാക്‌സ് ഈ സ്റ്റോക്ക് വാങ്ങുന്നതിനുള്ള ടാർ​ഗറ്റ് വില ഒരു ഷെയറിന് 2,156 രൂപയായി നിശ്ചയിച്ചു. 24-27 സാമ്പത്തിക വർഷത്തിൽ 18% CAGR-ൽ PPOP വളർച്ച പ്രതീക്ഷിക്കുന്നു. അതിൻ്റെ അടിസ്ഥാനത്തിൽ EPS വളർച്ച 15% CAGR ആയിരിക്കുമെന്ന് പ്രതീക്ഷിക്കുന്നു. ക്രെഡിറ്റ് കോസ്റ്റ് വായ്പാ ബുക്കിൻ്റെ 40-45 bps എന്ന പ്രൊജക്റ്റ് ശ്രേണിയിൽ തുടരുമെന്ന് പ്രതീക്ഷിക്കുന്നു.

ഇൻഡസ്ഇൻഡ് ബാങ്ക്

മോർഗൻ സ്റ്റാൻലി ഈ ഇൻഡസ്ഇൻഡ് ബാങ്ക് ഓഹരിയ്ക്ക് 'ഇക്വൽ വെയ്റ്റ്' റേറ്റിംഗ് നൽകി. മാത്രമല്ല അതിൻ്റെ ടാർ​ഗറ്റ് വില 1,400 രൂപയിൽ നിന്ന് 1,150 രൂപയായി കുറയ്ക്കുകയും ചെയ്തു. MFI അസറ്റ് നിലവാരം കാരണം ഓരോ പാദത്തിലേയും ഫലങ്ങൾ മോശമാണെന്നും അതിനുശേഷം ഓഹരി വില 30% ഇടിഞ്ഞെന്നും ബ്രോക്കറേജ് പറഞ്ഞു.

ടിറ്റാ​ഗഡ് റെയിൽ

എച്ച്.എസ്.ബി.സി ഈ ഓഹരി വാങ്ങുന്നതിനായി ഒരു വില നിശ്ചയിച്ചിട്ടുണ്ട്. ടിറ്റാ​ഗഡ് റെയിൽ ഓഹരിയുടെ ടാർ​ഗറ്റ് വില ഒരു ഷെയറിന് 1,425 രൂപയാണ്. ബ്രോക്കറേജ് അതിൻ്റെ വരുമാനവും ഇ.പി.എസ് എസ്റ്റിമേറ്റും സാമ്പത്തിക വർഷം 2026-27 ലേയ്ക്ക് 9-11% കുറച്ചു.